Իսրայելի Պաշտպանության բանակը հայտարարել է, որ երկժամյա մարդասիրական հրադադարը խախտվել է ՀԱՄԱՍ-ի մեղքով:
«Հրադադարի մասին համաձայնությունը խախտվեց ՀԱՄԱՍ-ի մեղքով, որը շարունակեց կրակել մեր զինվորների ուղղությամբ: Մենք ստիպված ենք պատասխանել»,- իսրայելական բանակի հրամանատարության աղբյուրի խոսքերն է մեջբերում РИА Новости-ն:
Ավելի վաղ տեղեկացվում էր, որ Իսրայելը համաձայնել է տեղական ժամանակով 13:30-ից մինչեւ 15:30-ը մարդասիրական հրադադար հայտարարելու՝ ՀԱՄԱՍ-ի առաջարկին:
Հիշեցնենք, որ Իսրայելն արդեն երրորդ օրն է՝ ցամաքային գործողություն է իրականացնում Գազայի հատվածում: ՀԱՄԱՍ խմբավորման զինյալներն այդ ընթացքում ուժեղացրել են իսրայելական տարածքների հրթիռակոծությունները: Գազայի բազմաթիվ բնակիչներ խուճապահար լքել են քաղաքը: Հակամարտության մեկնարկից ի վեր Գազայի հատվածում զոհերի ընդհանուր թիվը հասել է շուրջ 400-ի: Իսրայելական կողմից սպանվել է 7 մարդ, այդ թվում՝ 2 խաղաղ բնակիչ:
Ավելի վաղ հաղորդվում էր, որ հազարավոր մարդիկ են փախչում Գազայի հատվածի Էշ-Շուջիա թաղամասից: Կիրակի վաղ առավոտյան շրջանը ենթարկվել է իսրայելական ռազմաօդային ուժերի հարձակումներին: Պաղեստինյան բժիշկները տեղեկացնում են առնվազն 40 զոհի մասին, վիրավորվել է շուրջ 400 մարդ: Հարձակման հետեւանքով զոհվել են նաեւ ՀԱՄԱՍ-ի քաղբյուրոյի անդամներից մեկի որդին՝ կնոջ եւ երեխաների հետ:
