Իրանի իսլամական հանրապետության խորհրդարանի խոսնակ Ալի Լարիջանին մահմեդական հանրությանը կոչ է արել ակտիվ դիրքորոշում ցուցաբերել իսրայելական հարձակումներից տուժած Գազայի հատվածի բնակիչներին օգնություն ցուցաբերելու հարցում: Այս մասին գրում է «ՌԻԱ Նովոստի»-ն՝ վկայակոչելով IRNA գործակալությանը:
Կիրակի Լարիջանիի եւ Օմանի նրա գործընկեր Հալեդ բեն Հիլալ ալ-Մաուլիի միջեւ կայացած բանակցությունների ընթացքում իրանցի քաղաքական գործիչն ընդգծել է ամբողջ աշխարհի մահմեդական երկրների առաջնորդների միջեւ սերտ համագործակցության անհրաժեշտությունը: Լարիջանիի խոսքով, այդ համագործակցությունը թույլ կտա ապագայում խուսափել «Պաղեստինի ժողովրդին բաժին հասած ողբերգության կրկնությունից»:
Իրանի խորհրդարանի խոսնակը վրդովմունք է հայտնել իսրայելական զինվորականների կողմից Գազայի հատվածի խաղաղ բնակչության դեմ «անմարդկային եւ դաժան» հարձակումների կապակցությամբ եւ մահմեդական երկրների իշխանություններին կոչ է արել «կատարել իրենց սրբազան պարտքը»՝ պաղեստինցի ժողովրդի համար անհրաժեշտ պաշտպանություն ապահովելով:
Լարիջանին նաեւ հայտարարել է, որ լինելով Իսլամական երկրների միջխորհրդարանական միության ղեկավար՝ Իրանը մտադիր է լրջորեն դիտարկել պաղեստինցի ժողովրդին իրական օգնություն ցուցաբերելու հարցը: