ՌԴ նախագահ Վլադիմիր Պուտինը Ուկրաինայում հակամարտող բոլոր կոմերին կոչ է արել պայմաններ ապահովել Դոնեցկի մարզում մալայզիական Boeing-ի ողբերգական վթարի համակողմանի քննության համար: Պուտինը համապատասխան հատուկ հայտարարություն է արել այդ կապակցությամբ:
Նա Դոնեցկում կատարվածն անվանել է ահավոր ողբերգություն եւ հիշեցրել, որ Ռուսաստանը «բազմիցս հակամարտող բոլոր կողմերին կոչ էր արել անմիջապես դադարեցնել արյունահեղությունը եւ բանակցությունների սեղանի շուրջ նստել»:
«Վստահաբար կարելի է ասել, որ եթե հունիսի 28-ին Ուկրաինայի արեւելքում ռազմական գործողությունները չվերսկսվեին, ապա այս ողբերգությունն էլ չէր լինի», - նշել է նախագահը, փոխանցել են ՌԴ նախագահի մամուլի ծառայությունից:
«Միաժամանակ, ոչ ոք չպետք է եւ իրավունք էլ չունի այս ողբերգությունն օգտագործել նեղ շահադիտական քաղաքական նպատակների հասնելու համար»,- ընդգծել է Պուտինը: Նա հավելել է, որ նման դեպքերը պետք է ոչ թե պառակտեն, այլ միավորեն մարդկանց:
«Հարկավոր է, որ բոլոր այն անձինք, ովքեր պատասխանատու են տարածաշրջանի իրավիճակի համար, բարձր պատասխանատվություն զգան ե՛ւ սեփական ժողովրդի, ե՛ւ այն երկրների ժողովուրդների առաջ, որոնց ներկայացուցիչները ողբերգության զոհ են դարձել»,- կոչ է արել ՌԴ նախագահը:
