Չեչնիայի ղեկավար Ռամզան Քադիրովը դատապարտել է Գազայի հատվածում Իսրայելի բանակի գործողությունները:
«Իսրայելական ռումբերից եւ արկերից անմեղ մարդիկ են զոհվում: Մենք խոր ցավակցություն ենք հայտնում զոհերի մտերիմներին եւ հարազատներին եւ բոլորին կոչ ենք անում սատարել Պաղեստինի ժողովրդին: Իսրայելը հերթական անգամ ոչ մի կերպ չարդարացված դաժանություն է ցուցաբերում: Պաղեստինից արձակված հրթիռները չեն վնասել Իսրայելին: Սակայն պատասխան հարվածները հարյուրավոր պաղեստինցիների կյանք են խլում: Իսրայելը սպանում է երեխաներին, անպաշտպան կանանց եւ ծերերին: 400-ից ավելի մարդ է զոհվել», - գրել է Քադիրովը սոցցանցերի իր պաշտոնական էջերից մեկում, փոխանցում է ԻՏԱՌ-ՏԱՍՍ-ը:
Ըստ նախագահի՝ ԱՄՆ-ն եւ Եվրոպան հանգիստ են նայում դրան՝ չձեռնարկելով ոչ մի քայլ, չնայած «Իսրայելի գործողությունները պետական ահաբեկչություն են»:
Նա հիշեցրել է նաեւ Սիրիայում, Իրաքում, Աֆղանստանում, Լիբիայում, Եգիպտոսում իրավիճակի մասին, «որտեղ մահմեդականները պատերազմում են միմյանց դեմ»:
«Նրանք բոլորը պնդում են, որ ջիհադի ճանապարհին են: Ջիհադն այդպես չի լինում: Մեր ջիհադը պետք է դառնան կրթությունը, մշակույթը, գիտությունը, սպորտը, հոգեւորը», - ընդգծել է Քադիրովը: