Մեքսիկայի իշխանությունները քննարկում են տրանսպորտային միջանցքի կառուցման հնարավորությունը, որը կկապի Խաղաղ եւ Ատլանտյան օվկիանոսները: Այս մասին հայտնել է Օահակա նահանգի նահանգապետ Գաբինո Մոնտեագուդոն:
«Միջանցքը Օահակայի Սալինա Կուրս նավահանգստից կհասնի Վերակրուս նահանգի Կոացակոալկոս նավահանգիստ: Այն թույլ կտա որկու օվկիանոսները կապել արդեն գոյություն ունեցող երկաթուղով, որը կարդիականացվի եւ կընդլայնվի», — նահանգապետի խոսքերն է փոխանցում «ՌԻԱ Նովոստին»:
Մոնտեագուդոյի խոսքով՝ քանի որ խոսքը ցամաքային տրանսպորտային ճանապարհի մասին է, այդ միջանցքը Պանամայի ջրանցքի ուղղակի մրցակից չի դառնա:
Ըստ նահանգապետի՝ նախագահ Էնրիկե Պենյա Նյետոյի կողմից հավանության դեպքում 3-4 տարի կպահանջվի նախագծի իրագործման համար:
Տվյալ տրանսպորտային միջանցքը կարող է Ամերիկայի տարածքով Խաղաղ եւ Ատլանտյան օվկիանոսները կապող արդեն երրորդ երթուղին դառնալ: Հուլիսի սկզբին հաստատվել էր Նիկարագուայի տարածքով օվկիանոսների միջեւ նոր ջրանցքի երթուղու վերջնական տարբերակը:
