Ռուսաստանում յուրացումների եւ հանցավոր եղանակով ձեռք բերված փողերի լվացման մեջ կասկածվող հայ հայտնի գործարար Լեւոն Հայրապետյանի պաշտպանությունը բողոքարկել է նրա կալանքը: Այս մասին հայտնել է նրա փաստաբան Ռուբեն Մարգարյանը:
«Մենք Մոսկվայի քաղաքային դատարանին խնդրում ենք չեղարկել Բասմանի դատարանի կալանավորման մասին որոշումը՝ որպես անօրինական եւ անհիմն որոշում, ու ազատազրկման հետ կապ չունեցող խափանման միջոց ընտրել», - նրա խոսքերն է մեջբերում ԻՏԱՌ-ՏԱՍՍ-ը:
Սպասվում է, որ հուլիսի 24-ին Հայրապետյանին պաշտոնական մեղադրանք կներկայացվի:
Ավելի վաղ Մոսկվայի Բասմանի դատարանը գործարարին կալանավորել էր մինչեւ սեպտեմբերի 15-ը: Այս քրգործի շրջանակում կալանք էր դրվել նաեւ «Բաշնեֆտ» ընկերության բաժնետոմսերի վրա, որոնց արժեքը գերազանցում է 300 մլն ռուբլին:
Հայրապետյանն ինքը մեղքը չի ընդունում եւ հերքում է բոլոր մեղադրանքները:
65-ամյա գործարարը ձերբակալվել էր հուլիսի 15-ին Մոսկվայի Դոմոդեդովո օդանավակայանում, որտեղ նա ժամանել էր Նիցցայից: Նրա ձերբակալման հիմք էին ծառայել Բաշկիրիայի նախկին սենատոր Իգոր Իզմեստեւի ցուցմունքները, որը ցմահ ազատազրկման է դատապարտված մի շարք ծանր հանցագործությունների համար:
