Հայաստանում կրճատվել է անչափահասների կողմից կատարվող հանցագործությունների թիվը: Այս մասին հուլիսի 21-ի մամուլի ասուլիսում հայտարարել է ՀՀ ոստիկանության անչափահասների իրավունքների պաշտպանության եւ ընտանեկան բռնության դեմ պայքարի վարչության պետ Նելլի Դուրյանը:
Ըստ նրա` այս տարվա առաջին կիսամյակում հանրապետությունում գրանցվել է անչափահասների կողմից կատարված 180 հանցագործություն` անցյալ տարվա նույն ժամանակահատվածի 212 դեպքի համեմատ: Զուգահեռ կրճատվել է մանկահասակ իրավախախտների թիվը` նախորդ տարվա 180-ից հասնելով 160-ի:
Վարչության պետը նշել է գողության, թմրանյութերի շրջանառության, խուլիգանության, մարմնական վնասվածքներ հասցնելու դեպքերի կրճատումները: Միեւնույն ժամանակ, ավելացել է սառը զենք կրելու դեպքերի թիվը` 4-ից մինչեւ 7:
Նելլի Դուրյանը վստահեցրել է, որ պրոֆիլակտիկ աշխատանքները եւ հերթապահությունը շարունակվում են:
Անչափահասների շրջանում ամենատարածված խախտումները գողությունն ու մարմնական վասվածքներ հասցնելու դեպքերն են: Անչափահասների շրջանում ծանր հանցագործությունների շարքից գրանցվել է սպանության եւ աշխատանքային թրաֆիքինգի մեկական դեպք: Սեռական թրաֆիքինգի դեպքեր չեն բացահայտվել: