Հայաստանի Ոստիկանությունում հաշվառման մեջ են մոտ 350 անչափահասներ: Այդ մասին այսօր՝ հուլիսի 21-ին, մամուլի ասուլիսին հաղորդեց անչափահասների իրավունքների պաշտպանության եւ ընտանեկան բռնության դեմ պայքարի վարչության պետ, ոստիկանության գնդապետ Նելլի Դուրյանը:
Նրա խոսքով՝ Հայաստանի արդարադատության դատարանի քրեակատարողական հիմնարկում ներկայումս ծանրագույն հանցագործությունների համար դատապարտված 10 անչափահասներ են գտնվում: «Հայաստանում անչափահասների նկատմամբ բավականին մարդասիրական վերաբերմունք է ցույց տրվում», - ընդգծեց Նելլի Դուրյանը: Այս առումով նա նշեց, որ անչափահասենրի մեծ մասը ազատվում են պատժից եւ հաշվառման մեջ հայտնվում: Ներկայումս հաշվառման մեջ են մոտ 350 անչափահասներ, ինչը անցյալ տարիների համեմատությամբ երեք անգամ ավելի քիչ է:
Գնդապետն ընդգծեց, որ անչափահասների ընտանիքների սոցիալական դրությունը իրավախախտումների հիմնական պատճառը չէ: Հակառակը, այս պատճառը վերջին տեղում է: «Իհարկե, կան երեխաներ, ովքեր գողանում են՝ չգիտակցելով իրենց արարքը: Իսկ հիմնականում իրավախախտումների պատճառը ծնողների օրինակն է ու ընտանիքում դաստիարակության պակասությունը», - նշեց Նելլի Դուրյանը:
Լուսանկարը՝ Արսեն Սարգսյանի/ NEWS.am
