Թել Ավիվի համալսարանի գիտնականները հայտնել են, որ ըստ իրենց ուսումնասիրության արդյունքների`քնի կտրուկ ընդհատումը նույն հետեւանքներն է ունենում, որոնք որ կլինեին, եթե մարդն օրական չորս ժամ քներ:
Գիտնականների ուսումնասիրությանը մասնակցել է 61 մարդ: Փորձի ընթացքում այդ մարդիկ տանն են եղել, իսկ նրանց ձեռքներին քնի ժամանակը կարգավորող հատուկ էկրաններ են ամրացված եղել:
Առաջին օրը փորձի մասնակիցները քնել են 8 ժամ: Երկրորդ օրը մասնակիցներին արթնացրել են կես ժամը մեկ` հեռախոսազանգով, որից հետո թույլ չեն տվել քնել 15 րոպե:
Երկու անգամ էլ առավոտյան փորձարկվողները համակարգչով առաջադրանքներ են կատարել, ինչպես նաեւ պատասխանել են իրենց ինքնազգացողության մասին հարցերին, փոխանցում է Mignews-ը:
Փորձը ցույց է տվել, որ անքնության գիշերվանից հետո մասնակիցների տրամադրությունն ավելի վատ է եղել, քան նախօրեին` չխոսելով էլ տարբեր առաջադրանքների արդյունքների մասին:
Կամավորներն այդպիսի գիշերվանից հետո, ըստ գիտնակնների, 24%-ով ավելի ցրված են եղել, 29%-ով ավելի դեպրեսիվ եւ 43%-ով ավելի հոգնած:
Այնուհետեւ փորձի մասնակիցներին թույլ են տվել քնել միայն 4 ժամ: Արդյունքները նույնական են եղել: