Հուլիսի 21-ին տեղի ունեցավ ՀՀ սփյուռքի նախարարության՝ Սփյուռքի երիտասարդների հայրենաճանաչության «Արի տուն» 2014թ ծրագրի 5-րդ փուլի բացման հանդիսավոր արարողությունը:
Ծրագրի մասնակիցներին ողջունեց ՀՀ սփյուռքի նախարար Հրանուշ Հակոբյանը: Նա մասնավորապես նշեց. «Ուրախ եմ, որ ձեր երազանքը իրականություն է դարձել և դուք արդեն հայրենիքում եք: Այն օրերը, որ անցկացնելու եք Հայաստանում, անմոռաց են լինելու, շարունակվելու է կապը նոր ընկերների հետ, ցանցը մեծանալու է: Շատ եմ ուզում, նաև խնդրում եմ ու պահանջում, որ հայերեն սովորեք: Մեր լեզուն միայն մերն է, ի տարբերություն, ասենք անգլերենի, որով նաև բազմաթիվ այլ ազգեր են հաղորդակցվում, ոչ մի ուրիշ ազգ հայերեն չի խոսում: Հայերենը մեր ինքնության խորհրդանիշն է: Ես կուզեի, որ այս 14 օրը շփվեիք միայն հայերենով: Ես հավատում եմ, վստահում եմ ձեզ»:
Նախարարը շնորհակալություն հայտնեց մասնակիցների ծնողներին և հյուրընկալ ընտանիքներին վստահության, համագործակցության համար:
Ավանդույթի համաձայն նախարարը «Արի տան» շապիկ հագցրեց ծրագրի ամենակրտսեր մասնակցին, 13 ամյա, մոսկվաբնակ Արման Ստեփանյանին:
Ելույթ ունեցան Էրեբունի վարչական շրջանի պատասխանատու Նելլի Մանուկյանը, Լիպեցկի կիրակնօրյա դպրոցի ուսուցչուհի Նառա, Վարդանյանը:
Իրենց կատարումներով ներկաներին ողջունեցին Լիպեցկից Գայանե Ասատրյանը, «Կռունկ» անսամբլը: Դոնի Ռոստովից Արթուր Գիվարգիզյանի երգի հնչյունների ներքո արիտունցիները շուրջպար բռնեցին:
Ծրագրի 5-րդ փուլին մասնակցելու համար Հայաստան են ժամանել 185 պատանիներ և աղջիկներ Ռուսաստանի Դաշնությունից, Նիդերլանդներից, Բելգիայից, Լիբանանից, Վրաստանից, Չեխիայից, Սիրիայից, Ղազախստանից, Իսպանիայից, Ուկրաինայից, Կանադայից, Շվեդիայից:
Ծրագրի մասնակիցները 9 օրվա ընթացքում կծանոթանան Հայաստանի պատմական և տեսարժան վայրերին, կունենան բազմաբնույթ հանդիպումներ պետական, հասարակական և մշակութային գործիչների հետ, հայրենագիտության դասեր կառնեն Հայրենիքում, կսովորեն ազգային պարեր և երգեր: Նախորդ փուլերի նման այս փուլում ևս նախատեսվում է 4-օրյա ճամբարային ծրագիր Ծաղկաձորում:
