Հայաստանի առաջին նախագահ Լեւոն Տեր-Պետրոսյանը պարզապես կրկնում է Ռուսաստանի դիրքորոշումը՝ Հայաստանի՝ ԵՏՄ-ին անդամակցելու ձգձգման պատճառ նշելով Հայաստան-Լեռնային Ղարաբաղ սահմանին մաքսակետ դնելը: Այս մասին NEWS.am-ին ասաց քաղաքական վերլուծաբան, «Ժառանգություն» կուսակցության անդամ Ստյոպա Սաֆարյանը՝ անդրադառնալով առաջին նախագահի վերջին հարցազրույցին: 

«Ինձ մի փոքր զարմացնում է Տեր-Պետրոսյանի վերլուծությունը, որովհետեւ ապրիլի կեսերից սկսած՝ ռուսական կողմն էր ցանկանում ներկայացնել, որ ԵՏՄ-ին անդամակցելու հարցում խոչընդոտում է Հայաստանը: Զարմանալի է, որ առաջին նախագահի կարխիքը համընկնում է Ռուսաստանի կարծիքի հետ: Տեր-Պետրոսյանն ուղղակի կրկնում է Ռուսաստանի դիրքորոշումը: Սա Ռուսաստանի հայտնի դիրքորոշումն է»,- ասաց նա:

Ստյոպա Սաֆարյանի խոսքով՝ Լեւոն Տեր-Պետրոսյանն իր հարցազրույցում ցանկանում է ցույց տալ, որ արձագանքում է ադրբեջանական դիվերսիոն խմբի ներթափանցման փորձին, ինչպես նաեւ հայ-ադրբեջանական սահմանին տիրող լարվածությանը:

«Լեւոն Տեր-Պետրոսյանն ուզում է ցույց տալ, որ իրենք արձագանքում են վերջին դեպքերին: Ի դեպ, սահմանին տիրող իրավիճակի մասին քաղաքական ոչ մի ուժ էլ խոսեց, ոչ ընդդիմադիր, ոչ իշխանական: Հետեւաբար, առաջին նախագահը մի կողմից մարդկանց ցույց է տալիս, որ իրենք իշխանության նման արձակուրդ չեն գնացել, մյուս կողմից էլ թեժ աշնան հույս է հայտնում»:

Ինչ վերաբերվում է առաջին նախագահի հարցազրույցի այն հատվածին, որ իշխանությունները մտրակի քաղաքականություն են վարում ԲՀԿ-ի նկատմամբ՝ քաղաքական վերլուծաբանն ընդգծեց, որ ՀԱԿ առաջնորդը վախենում է, որ ԲՀԿ-ն կարող է կես ճանապարհից լքել իրենց:

«Լեւոն Տեր-Պետրոսյանը ցանկություն ունի, որ Սահմանադրական փոփոխությունների գործընթացը դառնա քաղաքական ուժերի կոնսոլիդացման միջոց, եւ նա վախենում է, որ ԲՀԿ-ն տեղի կտա եւ կհամաձայնվի իշխանությունների հետ, այսինքն կես ճանապարհից կլքի: Իսկ Լեւոն Տեր-Պետրոսյանը այս կերպ հավաստիացնում է ԲՀԿ-ին, որ կպաշտպանի»:

Նշենք, որ ilur.am կայքին տված հարցազրույցում առաջին նախագահն անդրադարձել է հայ-ադրբեջանական սահմանին տիրող լարվածությանը, Հայաստանի՝ ԵՏՄ-ին անդամակցելու հարցին, իշխանությունների կողմից ԲՀԿ-ին ճնշելուն եւ սպասվող սահմանադրական փոփոխություններին:

Լուսանկարը՝  Արսեն  Սարգսյանի/NEWS.am