Երեւանի Աբովյան փողոցի վրա գտնվող գետնանցումի աստիճանների շինարարությունն ավարտվել է, քաղաքացիներն արդեն օգտվում են այդ գետնանցումից, սակայն սահմանափակ կարողություններով անձանց համար թեքահարթակ չի կառուցվել։ Երեւանի քաղաքապետարանի տեղեկատվության և հասարակայնության հետ կապերի վարչության պետ Արթուր Գեւորգյանը NEWS.am-ին հայտնեց, որ գետնանցումում յուրօրինակ լուծում է լինելու՝ վերելակ է կառուցվելու։
«Ես չեմ կարող ասել, թե վերելակը գետնանցումում որտեղ է կառուցվելու, բայց առաջին անգամ Երեւանում կիրառվելու է այդ մոդելը»,-ասաց Արթուր Գեւորգյանը՝ նշելով, որ ինքը տեղյակ չէ, թե կոնկրետ որ կազմակերպությունն է իրականացնում շինարարությունը։
Արթուր Գեւորգյանը նաեւ ասաց, որ քաղաքապետարանի կողմից շինարարություն իրականացնող բոլոր կազմակերպությունների առջեւ հստակ պահանջ է դրված՝ անպայման կառուցել թեքահարթակներ։
«Երեւանում իրականացվող բոլոր շինարարությունները պարտադիր պետք է հետեւեն քաղաքապետարանի պահանջին եւ հաշվի առնեն հաշմանդամություն ունեցող անձանց տեղաշարժի իրավունքը։ Ես չեմ կարծում, որ ինչ-որ կազմակերպություններ կփորձեն շրջանցել այդ պահանջը»,-ասաց Արթուր Գեւորգյանը։
