Ադրբեջանցի օլիգարխ Հաֆիզ Մամեդովը ֆրանսիացիներին բողոքի ցույցի է դրդել:
Haqqin.az-ը, վկայակոչելով ֆրանսիական լրատվամիջոցները, փոխանցում է, որ նախօրեին` տեղի ժամանակով առավոտյան ժ. 11-ին, Լանսի Բոլիարտ Դելիս փողոցում «Լանս» ֆուտբոլային ակումբի հազարավոր երկրպագուներ բողոքել են Մասնագիտական ակումբների վերահսկիչ պալատի որոշման դեմ, որը մերժել էր այդ ֆուտբոլային ակումբին ազգային առաջնության առաջին դիվիզիայում մասնակցության իրավունք տրամադրել:
Ցույցը սկսվել է «Լանս» ֆուտբոլային ակումբի հիմնով: Երկրպագուները պահանջել են ակումբի նախագահ Ժերվե Մարտելի հրաժարականը եւ ակումբի սեփականատեր Հաֆիզ Մամեդովի համոզիչ պատասխանները, որին համարում են բոլոր դժբախտությունների մեղավոր:
Երկրպագուները ձեռքներին ունեցել են «Ժերվե, մենք ճշմարտությունն ենք ցանկանում», «Ժերվե, կամ առաջին դիվիզիա, կամ էլ` հրաժարական», «Եվ ուր է ձեր 10 միլիոնը», եւ «Ուր է ձեր Հաֆիզ Մամեդովը» գրությամբ պաստառներ: Ցույցից հետո երկրպագուները երթ են կազմակերպել դեպի քաղաքապետարան, իսկ նրանց մի մասը ներխուժել է շենք` քաղաքապետի հետ հանդիպելու: Ցույցը լուսաբանել են ֆրանսիացի լրագրողները, իսկ Ֆրանսիայի հեռուստաալիքները մի շարք թողարկումներ են պատրաստել ցույցերի մասին:
Հիշեցնենք, ավելի վաղ Ժերվե Մարտելը Դիտորդական հանձնաժողով ֆուտբոլային ակումբի 43 միլիոնանոց բյուջե էր ներկայացրել, սակայն հանձնաժողովը լրացուցիչ երաշխիքներ էր պահանջել: 15-20 միլիոն եվրո ակումբի բյուջեում պետք է ներդներ հենց Հաֆիզ Մամեդովը: Այդ նպատակով նա մայիսին այցելել էր Ֆրանսիա եւ փաստաթուղթ ստորագրել «Լանսին» 17 միլիոն եվրո հատկացնելու վերաբերյալ:
Սակայն հանձնաժողովը պահանջել էր, որպեսզի փողերը մինչեւ հունիսի 25-ը փոխանցված լինեն ակումբի բանկային հաշվին: Այդ կապակցությամբ Ժերվե Մարտելն անցյալ շաբաթվա վերջին Բաքու էր մեկնել եւ հանդիպել Մամեդովին: Սակայն Ֆրանսիա էր վերադարձել ձեռնունայն:
Ֆրանսիական մամուլի հարցազրույցում Մարտելը հայտարարել էր, որ «Հաֆկան» սուր ֆինանսական ճգնաժամում է, սակայն խոստացել է 10 միլիոն եվրո հատկացնել հուլիսի սկզբում: Սակայն գումարն այդպես էլ չի ստացվել:
Նշենք, որ Հաֆիզ Մամեդովի բիզնես կայսրությունը վերջին ժամանակներս Ադրբեջանում կրախ է ապրում: Չնայած դրան` օլիգարխն անցյալ ամիս որոշել էր ձեռք բերել աշխարհի ամենահին ֆուտբոլային ակումբներից մեկը` «Շեֆիլդ Ուենզդեյը» 50 միլիոն եվրոյով: Եվ դա եւս մեկ անգամ վկայում է, որ Հաֆկան ձգտում է ոչ թե զարգացնել եվրոպական ֆուտբոլը, այլ եվրոպական ակումբների միջոցով օրինականացնել իր քրեական բիզնեսը եւ կապիտալը Եվրոպայում, նշում է թերթը: