Ադրբեջանական քարոզչամեքենան այնքան ջանասիրաբար է աշխատում, որ «սանրում» է հայկական ինտերնետ-տարածությունը՝ որեւէ «հարմար» բան գտնելու համար: Ընդ որում, չեն անտեսում ոչ միայն լրատվամիջոցներում հրապարակումները, այլեւ սոցիալական ցանցերում գրառումները:
Ադրբեջանական «քարոզիչների» տեսանկյունից՝ Լեռնային Ղարաբաղ այցելության մասին հրապարակումը «միանգամայն հարմար նյութ է»:
Այսպես, Oxu.Az-ն, հղում կատարելով ANS PRESS-ին, «լուր» է հրապարակել այն մասին, որ հուլիսի սկզբին մի խումբ երեւանցի կանայք այցելել են Լեռնային Ղարաբաղ եւ այնտեղ լուսանկարներ արել: Աղդամի մերձակայքի բարձունքներում արված լուսանկարների ներքո կանայք տարբեր մեկնաբանություններ են թողել: Պարզվել է, որ ավագ սերունդն ավելի հարգալից է վերաբերվել ադրբեջանցիներին եւ Աղդամին:
«Օրինակ՝ Վանուհի Հոբոսյան անուն-ազգանունով երիտասարդ աղջիկը սոցիալական ցանցում լուսանկար է հրապարակել եւ ժպիտով հայերեն մեկնաբանություն թողել. «Աղդամի ֆոնին, որն այլեւս չկա»: Իսկ Շուշիում արված լուսանկարում կանգնած է հաղթական դեմքով: Սակայն նրանից տարիքով մեծ Լիլիթ Կարապետյանը ռուսերենով հետեւյալ մեկնաբանությունն է գրել. «Այս սարի հետեւում Աղդամ քաղաքն է: Այդ քաղաքն այլեւս գոյություն չունի»: Կնոջ խոսքերում ակնհայտորեն տխրություն է զգացվում»,- գրում է հրատարակությունը:
Այսինքն՝ ադրբեջանցի քարոզիչները խնդիրներ ունեն ոչ միայն բառերի եւ ձեւակերպումների հետ, այլեւ պահանջներ՝ կապված «դեմքի արտահայտության» հետ: Այս անգամ, սակայն, ադրբեջանցիները ոչ միայն հաստատեցին, որ մանրազնին հետեւում են հայկական ինտերնետ-տարածությանը, այլեւ փաստեցին ադրբեջանցիների հանդեպ հայերի ավելի մարդկային վերաբերմունքը: Գոնե այն փաստի համեմատ, որ Ադրբեջանի իշխանություններն արգելում են հայկական ազգանունով անձանց մուտքը երկիր: