Ամերիկյան Հետաքննությունների դաշնային բյուրոն (ՀԴԲ) ԱՄՆ-ում բնակվող մահմեդականներին հաճաք դրդել է ահաբեկչության՝ նրանց դեմ կեղծ գործողություններ իրականացնելով, ասված է Human Rights Watch իրավապաշտպանական կազմակերպության զեկույցում:
Իրավապաշտպաններն ուսումնասիրել են դատական վերջին 27 գործընթացները, որոնց դեպքում իսլամ դավանող անձինք մեղադրվում էին ահաբեկչական ակտի կազմակերպման մտադրության մեջ: Պարզվել էր՝ այդ մարդկանց կեսի պարագայում ՀԴԲ-ն կեղծ գործողություններ է իրականացրել:
«ՀԴԲ-ն մարդկանց ահաբեկչական քայլերի է դրդել: Չի բացառվում, որ որոշ դեպքերում գերատեսչությունն ինքն է օրինավոր քաղաքացիներին ահաբեկիչ դարձրել», - նշված է զեկույցում, փոխանցում է ԻՏԱՌ-ՏԱՍՍ-ը:
Կազմակերպության Վաշինգտոնի գրասենյակի փոխտնօրեն Անդրեա Փրեսոուի խոսքով՝ ամերիկյան իշխանությունները պնդում են, որ ԱՄՆ-ի տարածքում ակտիվ պայքար են մղում ահաբեկչության դեմ:
«Սակայն եթե ավելի ուշադիր քննենք այդ գործերը, պարզ կդառնա, որ մարդիկ չէին գործի իրենց վերագրվող հանցանքները, եթե իրավապահ մարմինները նրանց չդրդեին եւ նրանց վրա ճնշում չգործադրեին: Որոշ դեպքերում իշխանություններն անգամ վճարել են մարդկանց՝ նրանց ահաբեկչության մղելու համար», - հայտարարել է Փրեսոուն: