Լեռնային Ղարաբաղի Քաշաթաղի հյուսիսային մասում այսօր՝ հուլիսի 22-ին, ականապատ տարածքում «Տոյոտա» մակնիշի մեքենայի պայթյունի հետեւանքով վիրավորված Արմավիրի քաղաքապետ Ռուբեն Խլղաթյանին եւ մյուս երկու վիրավորներին քիչ առաջ տեղափոխել են Երեւանի «Էրեբունի» բժշկական կենտրոնի վերակենդանացման բաժանմունք. հերթապահ բժիշկը հիվանդանոցում հավաքված քաղաքապետի հարազատներին տեղեկացրել է, որ Ռուբեն Խլղաթյանի վիճակը կայուն է։ (ֆոտռեպորտաժ)
Հիվանդանոցի հասարակայնության հետ կապերի բաժնի պետ Շուշան Հունանյանը NEWS.am-ին ասաց, որ երեքի վիճակն էլ ծանր կայուն է, առաջին բուժօգնությունը ցուցաբերվել է, հետազոտությունները կատարվել են, բոլորն ունեն պոլիտրավմաներ. «Քաղաքապետն ունի գլխուղեղի սալջարդ, արյունազեղում, հինգերորդ մատի վնասվածք։ Մյուսներն ունեն ուղեղի ցնցում եւ սրունքի կոտրվածք»։
Արտակարգ իրավիճակների նախարարությունից տեղեկանում ենք, որ դեպքը տեղի է ունեցել հուլիսի 22-ին առավոտյան ժամը 06.30-ին սահմաններում ԼՂՀ-ի Քաշաթաղի շրջանի Վաղազին գյուղում. «Տոյոտա պրադո» մակնիշի 71OM100 պետհամարանիշի ավտոմեքենան պայթել է ականապատ տարածքում, ինչից վարորդը տեղում զոհվել է, իսկ ուղևորներ Ռուբեն Խլղաթյանը, Ա. Բ.-ը և Գ. Ա.-ը հոսպիտալացվել են բժշկական կենտրոն, այնուհետեւ ուղղաթիռով տեղափոխվել Երևանի «Էրեբունի» բժշկական կենտրոն: