Ուկրաինայի իշխանությունները երկրում ստեղծված ճգնաժամից դուրս գալու ելքը տեսնում են:
Այդ մասին այսօր՝ հուլիսի 22-ին, մամուլի ասուլիսին հայտարարել է Հայաստանում Ուկրաինայի արտակարգ եւ լիազոր դեսպան Իվան Կուխտան:
Ի պատասխան հարցին՝ որքա՞ն հեռու է պատրաստ գնալ Ուկրաինայի ղեկավարությունը եւ ճգնաժամից դուրս գալու ինչպիսի՞ ելք է տեսնում՝ դեսպանը լավատեսորեն նշեց, որ անելանելի վիճակներ չեն լինում:
Դիվանագետը հիշեցրեց, որ ճգնաժամային իրավիճակից դուրս գալու ծրագիրը ներկայացված էր երկրի նախագահի երդմնակալության ելույթում:
«Դա առաջին հերթին երկրի արեւելքում իրավիճակի կայունացումն է, ռազմական գործողությունների դադարեցումը, զինյալների կողմից զենքի վայր դնելը: Ծանր հանցագործությունների հետ առնչություններ չունեցողների նկատմամբ համաներում կկիրառվի», - նշեց դեսպանը:
Այնուհետեւ անհրաժեշտ է իշխանության ապակենտրոնացում, տեղական ինքնակառավարման մարմինների արտահերթ ընտրություններ: Այնուհետեւ պատգամավորական ընտրություններ, որոնք, հավանաբար, հոկտեմբերին կանցկացվեն: Անհրաժեշտ են նաեւ ազգային փոքրամասնությունների իրավունքների ու շահերի պաշտպանությանն ուղղված սահմանադրական բարեխոխումներ:
Միեւնույն ժամանակ, դեսպանը կտրականապես հերքեց այն դրույթը, որ Ուկրաինայի ռուս բնակչությանը ճնշում են: Նրա խոսքով՝ այս պնդումը Ռուսաստանում են հորինել: Որպես ազգային համերաշխության օրինակ՝ Կուխտան սեփական ընտանիքը բերեց. «Ես ուկրաինացի եմ, կինս՝ ռուս, մենք մեր երեխաներին չենք կիսում: Կիեւում շատերն են խոսքում ռուսերենով»:
Նրա խոսքով՝ իրավիճակը ավելի ապակայունացնելու ձգտումը թելադրվում է բարեփոխումներն իրականացնելու դժկամությամբ: «Ուկրաինայի նախագահը պատրաստ է բանակցությունների: Սակայն զինյալների եւ ավազակների հետ բանակցությունների սեղան չի նստի», - հայտարարեց դեսպանը: