Բաքվում ինքնահրկիզվել է ղարաբաղյան պատերազմի եւս մեկ մասնակից: Vesti.az-ը, վկայակոչելով Խազարի շրջանի դատախազությունը, հայտնում է, որ ինքնասպանությունը կատարվել է հուլիսի 20-ի գիշերը Բուզովնա ավանում՝ Թելմանի փողոցի թիվ 24 շենքի մոտ: Մայրաքաղաքի բնակիչ, 1971թ. ծնված Նուրիեւ Ջոշգուն Էյվազօղլուն հարազատների աչքի առաջ վրան բենզին է լցրել եւ կրակ տվել: Հարազատները փորձել են մարել կրակը, սակայն նրան փրկել չի հաջողվել: Ութ ժամ անց Նուրիեւը հիվանդանոցում մահացել է:
«Նախաքննության ընթացքում պարզվել է, որ Նուրիեւն ամուրի էր, գործազուրկ, որոշ ժամանակ է բնակվում էր հարազատների տանը, որոնց տան մոտ էլ ինքնահրկիզվել է: Նուրիեւը ղարաբաղյան պատերազմի մասնակից էր, ինչն էլ, հավանաբար, հետք էր թողել տղամարդու հոգեվիճակի վրա», - նշել են դատախազությունում:
Հիշեցնենք, նման դեպքերն Ադրբեջանում բացառություն չեն: Հուսահատության եզրին գտնվող ղարաբաղյան պատերազմի մասնակիցները եւ փախստականները ուշադրություն գրավելու համար ստիպված դիմում են ծայրահեղ քայլերի: