Դե ֆակտո Հայաստանի եւ Լեռնային Ղարաբաղի միջեւ միացյալ տնտեսական տարածքը կպահպանվի, դե յուրե Երեւանը կմտնի Եվրասիական միություն՝ միջազգայնորեն ճանաչված սահմաններով: Այս մասին հուլիսի 22-ի մամուլի ասուլիսում հայտարարել է քաղաքագետ Ալեքսանդր Մարկարովը՝ մեկնաբանելով Հայաստանի ԵՏՄ-ին անդամակցելու գործընթացը:
Միաժամանակ, Մարկարովը չի բացառել, որ հանրապետությունների միջեւ կարող է մաքսակետ դրվել, սակայն, ըստ նրա, դա կարող է ձեւական բնույթ ունենալ:
Անդրադառնալով կառույցին անդամակցելու ժամկետներին՝ քաղաքագետը նշել է, որ գործընթացը ձգձգվում է տարբեր պատճառներով, այդ թվում նաեւ՝ կազմակերպության հիմնադիր անդամների միջեւ չլուծված խնդիրների:
Նշենք, օրերս ՀՀ վարչապետ Հովիկ Աբրահամյանը հայտարարել էր, որ ԵՏՄ երկրի անդամակցության համաձայնագիրը կստորագրվի մինչեւ հոկտեմբերի վերջ:
Կառույցի ստեղծման պայմանագիրը ստորագրվել էր մայիսի 29-ին Աստանայում՝ Ռուսաստանի, Բելառուսի եւ Ղազախստանի նախագահների կողմից: Այն ուժի մեջ կմտնի 2015թ. հունվարի 1-ից:
