Բազմաթիվ հաճախորդներ, բախվելով տուրիստական ընկերությունների գնային խարդախությունների հետ, հոգեբանական ճնշվածություն են զգում: Այս մասին հուլիսի 22-ին լրագրողների հետ հանդիպմանը հայտարարեց հոգեբանության դոկտոր Սամվել Խուդոյանը: Նրա խոսքով, մի շարք պատճառներով, այդ թվում՝ մանրախնդիր չհամարվելու համար, հաճախորդները համաձայնում են հավելյալ վճարել: Երբեմն տուրիստական ընկերությունների ներկայացրած վերջնական հաշիվը զգալիորեն տարբերվում է գովազդված գներից:
Հոգեբանը հավելեց, որ նման դեպք տեղի է ունեցել նաեւ իր հետ, երբ դեպի Անթալիա գովազդված 400 դոլար արժողությամբ ուղեգիրը հազար դոլարից ավելի է արժեցել, այն էլ՝ երեխայի համար: Նրա խոսքով, նման դեպքերում ընդդիմանում է հաճախորդների ընդամենը 1-2%-ը, իսկ մյուսները չեն վիճում եւ համակերպվում են իրավիճակի հետ: