Թուրքիայի 22 նահանգներում հուլիսի 22-ի առավոտյան սկսվել են լայնածավալ ձերբակալություններ 2013-ի դեկտեմբերին «Մեծ կաշառք» գործողություններն իրականացրած ոստիկանության բարձրաստիճան պաշտոնյաների դեմ։

Թուրքական Sozcu պարբերականի փոխանցմամբ՝ Ստամբուլում, Անկարայում, Իզմիրում, Դիարբեքիրում, Վանում եւ այլուր իրականացված համաժամանակյա գործողությունների ժամանակ ձերբակալվել են  67 «Մեծ կաշառք» գործողություններն իրականացրած ոստիկանապետեր եւ ոստիկաններ։

Հայտնի է, որ ձերբակալման որոշում է կայացվել 115 ոստիկանի նկատմամբ։ Ձերբակալված ոստիկանների տներում խուզարկություններ են իրականացվում։

Աչքի ընկել այն հանգամանքը, որ մի շարք ոստիկանապետերի ձերբակալման մասին լուրը հայտնելուց հետո ձեռնաշղթաներ են հագցրել։

Թուրքական մամուլն այս ձերբակալությունները կապում է 2013-ի դեկտեմբերին «Մեծ կաշառք» սկանդալային գործողության հետ։ Ձերբակալված ոստիկաններն ու ոստիկանապետերը անմիջական կապ են ունեցել այդ գործողություններին։

Նշենք, որ 2013-ի դեկտեմբերի 17-ին Թուրքիայի մի շարք վայրերում տեղի է ունեցել համաժամանակյա գործողություն, որը ստացել է «Մեծ կաշառք» անունը։ Գործողության ժամանակ ձերբակալվել եւ այնուհետ կալանավորվել են նախարարների որդիներ,գործարարներ եւ պաշտոնյաներ։