Արտաշիսյան 41 շենքի բակում, այսօր՝ հուլիսի 22-ի կեսգիշերին, անհայտ անձինք դաժան ծեծի են ենթարկել Արման Բաբիկյանին, ով հանցավոր աշխարհում հայտնի է «Զուբ» մականունով: Նա բազմաթիվ վնասվածքներով տեղափոխվել է «Էրեբունի» բժշկական կենտրոն: Միջադեպը NEWS.am-ի հետ զրույցում հաստատել է Երեւանի ոստիկանապետ Աշոտ Կարապետյանը` առանց մանրամասներ նշելու:
Վերջինս հայտնել է, որ կատարվում է հետաքննություն, ինչի արդյունքում էլ կպարզվի իրականությունը: Վերջինս նշել է նաեւ, որ դեռ բերման ենթարկված անձ չկա:
Նշենք, որ Արման Բոբիկյանը Շենգավիթում բուքմեյքերական կետ ունի: Ինչ վերաբերում է ծեծվողի հանցագործ աշխարհի ներկայացուցիչ լինելուն, Երեւանի ոստիկանապետը ծիծաղով է արձագանքել:
Ավելի վաղ Shamshyan.com-ը հայտնել էր, որ Երեւանում անհայտ անձանց կողմից դաժան ծեծի է ենթարկվել հանցագործ աշխարհում հայտնի Զուբը, վերջինս վերակենդանացման բաժանմունքում է: Նա «գլխի սալջարդ-վերքեր», «գանգուղեղի ցնցում», «նախաբազկի սալջարդ-վերքեր» եւ «հիշողության կորուստ» ախտորոշմամբ տեղափոխվել է «Էրեբունի» բժշկական կենտրոն: Ըստ շենքի բնակիչների պատմածի՝ ծեծը կազմակերպել է Երեւանի ավագանու անդամ Դավիթ Սեդրակյանը, ով ԱԺ պատգամավոր Մհեր Սեդրակյանի տղան է:
