Արջուտի ոսկու հանքավայրի շահագործումը ռիսկեր է պարունակում տեղի խմելու աղբյուրների համար, գրում է «ԷկոԼուրը»:  

Նշենք, որ այսօր՝ հուլիսի 23-ին, տեղի կունենան «Բակտեկ էկո» ՍՊԸ-ի Արջուտի ոսկու հանքավայրի շահագործման նախագծի վերաբերյալ լիազորված անձի մասնագիտական եզրակացության, հասարակական եւ ազդակիր համայնքի ղեկավարի կարծիքների հասարակական լսումները:

Հանքավայրի նախագծի համաձայն` Արջուտի ոսկու հանքավայրը գտնվում է ՀՀ Լոռու մարզում` Վանաձոր քաղաքից 12.0 կմ,  Արջուտ գյուղից եւ նույնանուն կայարանից 4.0 եւ 5.0 կմ դեպի հյուսիս-արեւմուտք հեռավորության վրա, Բազումի լեռնաշղթայի հարավային լանջին, Փամբակ գետի ձախ ափին: Բացահանքի օտարման տարածքը կազմում է 15.7հա, իսկ լցակույտինը` 13.6հա: Հողատարածքը պայմանագրային կարգով տրամադրվելու է «Բակտեն Էկո» ՍՊԸ-ին: Հողատարածքի պայմանագրային արժեքը գնահատվել է ընդամենը 15.0 հազար դրամ մեկ հեկտար տարածքի համար, երբ  այս տարածքում  2231.3 հազար տոննա  սուլֆիդային հանքաքարում կա 3080.9կգ ոսկի, 17.64տ արծաթ եւ 6821տ պղինձ, իսկ օքսիդացված 192.4 հազար տ հանքաքարում կա 386.50 կգ ոսկի, 2.75տ  արծաթ:

Հանքավայրը շահագործվելու է բաց եղանակով, 2 փուլով: 1-ին փուլում շահագործվելու են օքսիդացված հանքաքարերը, 2-րդ փուլում սուլֆիդային հանքաքարերը: Առաջին փուլը տեւելու է 2 տարի, իսկ երկրորդ փուլը` 24 տարի: Բացահանքի տարեկան արտադրողականությունը կազմելու է 100.0 հազար տ ապրանքային հանքաքար: Արդյունահանված հանքաքարերը տեղափոխելու են մինչեւ 30կմ հեռավորության վրա գտնվող Արմանիսի հանքահարստացուցիչ ֆաբրիկա: Բացահանքում 1-ին փուլում աշխատելու է  27 մարդ, 2-րդ փուլում`  55 մարդ: Նշվում է, որ աշխատուժը լինելու է Արջուտ համայնքից:

Ռեկուլտիվացվելու է միայն լցակույտի տարածքը:

Նախագծում նշված է, որ հանքավայրի տարածքին բնորոշ են սեւահողը, ալրային կարբոնատացված հողերը, որոնք պիտանի չեն գյուղատնտեսական կուլտուրաների աճեցման համար: Կենդանական աշխարհից հանդիպում են` լճագորտ, ժայռային մողես, գայլ, աղվես, սովորական լորտու, սովորական դաշտամուկ,  մոխրագույն առնետ, քարակզաքիս, աքիս եւ անողնաշարավոր կենդանիներ: Բուսականության տեսանկյունից տարածքն աղքատ է, Կարմիր գրքում նշված բույսեր չկան: Չնայած սրան` նախագծում նշված է. «Հանքավայրի ուսումնասիրված տարածքում կան բազմաթիվ լեռնային աղբյուրներ, որոնց ջուրը պիտանի է խմելու համար: Շրջանում կան նաեւ տարբեր հանքային ջրերի աղբյուրներ»: Նշենք, որ գնահատված չէ, թե նախագիծն ինչ ռիսկեր է պարունակում  այդ  աղբյուրների վրա: Առավել եւս այն պարագայում, որ, հանքավայրը շահագործելիս, իրականացվելու են պայթեցման աշխատանքներ, որոնք կարող են վնասել ջրային աղբյուրները, ինչպես նաեւ թունավորել ջրերը տոքսիկ նյութերով: