Արցախի Քաշաթաղի շրջանում հուլիսի 22-ի վաղ առավոտյան ականի պայթյունի հետեւանքով վիրավորված Արմավիրի քաղաքապետ Ռուբեն Խլղաթյանի եւ նրա երկու ընկերների վիճակը համեմատաբար կայունացել է: Այս մասին NEWS.am-ին ասաց «Էրեբունի» բժշկական կենտրոնի վերակենդանացման բաժնի վարիչ Արմեն Մուրադյանը:
«Երեքի վիճակներն էլ համեմատաբար կայունացել են: Գիտակից են, քաղաքապետին այսօր արդեն հիվանդասենյակ կտեղափոխենք, իսկ մյուս երկուսը կմնան վերակենդանացման բաժանմունքում»,- ասաց նա:
Նշենք, որ Արմավիրի քաղաքապետն ունի գլխուղեղի սալջարդ, արյունազեղում եւ 5-րդ մատի կոտրվածք. վերջինիս երեկ երեկոյան վիրահատել են: Համեմատարաբ վատ վիճակում է քաղաքապետի մտերիմ ընկեր Գառնիկ Ավետիսյանը, որը ողնաշարի կոտրվածք ունի, նրան նույնպես երեկ վիրահատել են: Երրորդ վիրավորը՝ Արթուր Բաղդասարյանը, եւս ունի բավական լուրջ վնասվածք՝ կրծքավանդակի շրջանում, կողերի, կրծոսկրի, անրակի կոտրվածք, թոքերի վնասվածք:
Հիշեցնենք, որ դեպքը ըստ Արտակարգ իրավիճակների նախարարության տեղի է ունեցել հուլիսի 22-ին առավոտյան ժամը 06.30-ին սահմաններում ԼՂՀ-ի Քաշաթաղի շրջանի Վաղազին գյուղում. «Տոյոտա պրադո» մակնիշի 71OM100 պետհամարանիշի ավտոմեքենան պայթել է ականապատ տարածքում, ինչից վարորդը տեղում զոհվել է, իսկ ուղևորներ Ռուբեն Խլղաթյանը, Գառնիկ Ալեքսանյանը եւ Արթուր Բաղդասարյանը հոսպիտալացվել են բժշկական կենտրոն, այնուհետեւ ուղղաթիռով տեղափոխվել Երևանի «Էրեբունի» բժշկական կենտրոն:
