Իսրայելի վարչապետ Բինյամին Նեթանյահուն զանգահարել է ԱՄՆ պետքարտուղար Ջոն Քերրիին եւ կոչ արել չեղարկել Բեն-Գուրիոնի անվան օդանավակայանում ամերիկյան ավիաընկերությունների թռիչքների արգելքը, հաղորդում է BBC-ը:
Հիշեցնենք, որ ավելի վաղ ԱՄՆ Դաշնային ավիացիոն վարչությունը հանձնարարել էր, որ Իսրայել թռչող բոլոր երեք ամերիկյան ավիաուղիները՝ Delta, United եւ US Airways մի քանի օրով դադարեցնեն իրենց թռիչքները: ԱՄՆ պետքարտուղարությունը հայտարարել էր, որ այս որոշումը շահադրդված է բացառապես անվտանգության նկատառումներով: Հուլիսի 22-ին օդանավակայանից 1,5 կմ հեռավորության վրա ընկել էր Գազայի հատվածից ուղարկված հրթիռ:
Իսրայելի տրանսպորտի նախարարությունը ավելի վաղ կոչ էր արել ավիաընկերություններին վերանայել իրենց որոշումը՝ հայտարարելով, որ օդանավակայանը «անվտանգ է վայրէջքների ու թռիչքների համար»:
Նախարարության հայտարարությունում ասվում է, որ Բեն-Գուրիոնի անվան օդանավակայանը ամբողջապես պաշտպանվում է եւ «ամերիկյան ավիաընկերությունները ոչ մի պատճառ չունեն իրենց անհանգստությամբ ահաբեկիչներին նվեր մատուցել»: