Ռուսաստանի Սարատովի մարզի Վոլսկ քաղաքում կրակել, այնուհետեւ գետն են գցել ադրբեջանցի գործարարի:
Haqqin.az-ը, վկայակոչելով wolsk.ru-ն, հայտնում է, որ հուլիսի 18-ի երեկոյան Վոլգայի հատակին հայտնաբերված ավտոմեքենայում գտել են ազգությամբ ադրբեջանցի, 55-ամյա գործարար Ադիլխան Սարդարովի դին, որն անհետ կորել էր գրեթե երեք ամիս առաջ:
Գործարարին հայտնաբերել է սիրողական ջրասուզորդը: Դիմակով սուզվելիս տեղի բնակիչը գետի հատակին մեքենա է տեսել: Նա հիշել է, որ համացանցում գրել էին Սարդարովի հանելուկային անհետացման մասին, ով իր «վեցով» կորել էր ապրիլին, երբ դուրս էր եկել ավտոմասերի իր խանութից: Ստորջրյա լողի սիրահարը մտածել է, որ դա կարող է կորած ադրբեջանցու «Ժիգուլին» լինել ու այդ մասին հայտնել է իրավապահներին:
Դատաբժշկական փարձաքննությունը ցույց է տվել, որ Սարդարովին սպանել են գլխին արձակված կրակոցով, այնուհետեւ նրա մեքենան հրել գցել են գետը:
