Վաշինգթոնում քննադատության են ենթարկել Ուկրաինայի արեւելքում Boeing-777 օդանավի կործանման հանգամանքների մասին Ռուսաստանի պաշտպանության նախարարության տրամադրած տեղեկությունները, հայտարարել է ԱՄՆ պետքարտուղարության ներկայացուցիչ Մարի Հարֆը:
«Ակնհայտ է, որ սա փաստերի կամայական շարադրում եւ քարոզչություն է, եւ մենք կտրականապես համաձայն չենք դրա հետ», ասել է Հարֆը Վաշինգթոնում անցկացված ճեպազրույցի ընթացքում:
Հարֆի տվյալներով՝ ԱՄՆ-ը բաց աղբյուրներից եւ գաղտնեգրված «հսկայական քանակության ապացույցներ ունի», որոնք հերքում են ռուսների վարկածը: Ամերիկյան հետախուզությունը ավելի ուշ կհրապարակի իր տրամադրության տակ եղած տվյալները, ասել է Մարի Հարֆը: Այդ տվյալներով՝ հրթիռը բաց են թողել հենց ռուսամետ ակտիվիստները:
Հարֆը հավելել է, որ ՌԴ-ը Ուկրաինայի հարավ-արեւելքում տեղի ունեցած հակամարտության ողջ ընթացքում ապատեղեկատվություն եւ քարոզչություն է տարածում:
Ավելի վաղ, ՌԴ գլխավոր շտաբի օպերատիվ վարչության պետ, գեներալ-լեյտենանտ Անդրեյ Կարտոպոլովը հաղորդել էր, որ Ռուսաստանը Ուկրաինայի հակաօդային պաշտպանության դիրքերից մալայզիական ինքնաթիռի կործանման շրջանում տիեզերքից արված լուսանկարներ ունի:
