Մոսկվայում հուլիսի 15-ին տեղի ունեցած մետրոյի վթարի հետեւանքով տուժած հայազգի 20-ամյա Մերի Քոչարյանի վիճակը շարունակում է ծայրահեղ ծանր մնալ, արդեն շնչառության հետ էլ են խնդիրներ առաջացել: Այս մասին NEWS.am-ի հետ զրույցում ասաց Ռուսաստանում Հայաստանի դեսպանության խորհրդական Էդվարդ Ջամբազյանը:
«Մերի Քոչարյանն անփոփոխ ծանր վիճակում է, բժիշկներն ամեն ինչ անում են, որ վիճակը կայունացնեն, սակայն տարբեր խնդիրներ են առաջացել, արդեն թոքերն էլ չեն գործում, արհեստական շնչառություն է միացված: Լավագույն մասնագետներն են աշխատում»,- ասաց նա:
Նշենք, որ Մերի Քոչարյանն ունի ողնաշարի կոտրվածք եւ գլխուղեղի փակ վնասվածք: Բացի Մերիից՝ մետրոյի վթարից տուժել է նաեւ 23-ամյա Աննա Բուլղադարյանը, որն ունի աջ ճաճանչոսկրի կոտրվածք եւ տրավմատիկ ցնցում: Աննայի վիճակը համեմատաբար կայուն է, նա արդեն տեղափոխվել է հիվանդասենյակ:
Ինչպես ավելի վաղ էր հաղորդվել, Մոսկվայի մետրոյի Արբատո-Պոկրովյան գծի ռելսերից դուրս են եկել երեք վագոններ, վթարի հետեւանքով, նախնական տվյալներով, 23 մարդ է զոհվել, առնվազն 150-ը վիրավորվել են եւ գտնվում են հիվանդանոցում: Մոսկվայի մետրոպոլիտենի վթարի գործով ձերբակալվել են մետրոյի ճանապարհային ծառայության վարպետ Վալերի Պաշկատովն ու նրա օգնական Յուրի Գորդովը: Ռուսաստանի հատուկ քննչական ծառայությունների տվյալներով, վերջիններս կասկածվում են երթեւեկության անվտանգության կանոնները խախտելու մեջ: