«Բանդայի գործով» ամբաստանյալ Դավիթ Գալստյանն այսօր՝ հուլիսի 23-ին, դատարանի դահլիճում ինքնավնասում է արել։

NEWS.am-ի թղթակիցը հաղորդում է, որ այն բանից հետո, երբ դատախազը կարդաց Դավիթ Գալստյանի նախաքննական ցուցմունքը՝ ավարտելով այն «այս ամենը գրված է իմ կողմից, իմ ձեռքով» նախադասությամբ, ամբաստանյալը ձեռքը տարավ բերանը, հանեց ածելին, կտրեց դաստակը եւ գոռաց՝ «արյունս ծծել ես, ի՞նչ ես ուզում»։

Դատավորը, դա նկատելով, գլխով հասկացրեց ոստիկաններին, որոնք անմիջապես շրջապատեցին Դավիթ Գալստյանին ու խլեցին ածելին, սակայն ամբաստանյալը հասցրել էր վնասել ձեռքը։ Նրան արագ հեռացրին դատարանի դահլիճից։ Դատավորի հրահանգով բոլոր ներկաները լքեցին դահլիճը։ Ամբաստանյալին բուժօգնություն ցույց տալու համար շտապօգնություն են կանչել։

Դատական նիստն ընդհատվել է։

Նշենք, որ Դավիթ Գալստյանը տառապում է հոգեկան հիվանդությամբ եւ բուժվել է հոգեբուժարանում:

Հիշեցնենք, որ 2011թ. սեպտեմբերի 23-ին ոստիկանության կազմակերպված հանցագործության դեմ պայքարի վարչության աշխատակիցները ձերբակալել էին 16 անձի, որոնցից 11-ին ավելի ուշ ազատ էին արձակել: Կալանավորված Արտուշ Հակոբյանը, Քյարամ Ամոյանը եւ մյուսները մեղադրվում են բարձրաստիճան պաշտոնատար անձանց բնակարաններում, առանձնատներում ավազակային հարձակումներ իրականացնելու համար: Նշենք, որ ամբաստանյալներն իրենց մեղավոր չեն ճանաչում։