Վարդան Պետրոսյանի մասնակցությամբ ողբերգական ավտովթարի գործով տուժող կողմի փաստաբան Ռուբեն Բալոյանը վերջապես ասել է, թե ինչ «անբարո» առաջարկ է արել տուժող կողմին դերասանի փաստաբան Նիկոլայ Բաղդասարյանը։

«Նիկոլայ Բաղդասարյանն ինձ առաջարկել է, որ Հակոբյաններն ասեն, որ Նիվան վթարի պահին հետընթաց է կատարել, եւ այլեւս խնդիր չեն ունենա»,- այսօր՝ հուլիսի 23-ին, Կոտայքի մարզի ընդհանուր իրավասության դատարանում հայտարարեց Ռուբեն Բալոյանը։

Բալոյանի խոսքով՝ թեեւ այդ առաջարկն «անբարո» է եղել, բայց ինքն ասել է, որ կներկայացնի Հակոբյաններին, սակայն այդ առաջարկից Հակոբյանները վրդովվել են։

Դատավոր Վաղինակ Մկրտչյանն էլ իր հերթին նկատեց, որ տպավորություն է, թե դատավարական կողմերը Բալոյանը եւ Բաղդասարյանն են. «Դուք կարծես պաշտպաններ չեն, այլ ձեր դատն է»։

NEWS.am-ի թղթակիցը հաղորդում է, որ այսօրվա դատական նիստին ներկա են «Ժառանգության» առաջնորդ Րաֆֆի Հովհաննիսյանը եւ ԱԻՄ առաջնորդ Պարույր Հայրիկյանը։

Դատական նիստը շարունակվում է։

Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է կայանած «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ էդվարդ եւ էդգար Հայկի Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթևեկության կամ տրանսպորտային միջոցների շահագործման կանոնները խախտելը,  որն անզգուշությամբ առաջացրել է երկու կամ ավելի մարդու մահ»։ Տուժող կողմը փորձում է ապացուցել, որ Վարդան Պետրոսյանը վթարի պահին եղել է ալկոհոլի ազդեցության տակ եւ գերազանցել է թույլատրելի արագությունը։ Դերասանը հերքում է այդ վարկածը եւ իրեն հերթին փորձում է ապացուցել, որ տուժող կողմի մեքենան կայանած է եղել ոչ թե ճանապարհի կողնակին, այլ երթեւեկելի գոտում, ունեցել է անսարքություններ։