Եթե Արմավիրի քաղաքապետն ու նրա ընկերներն ականի վրա պայթել են ճանապարհի մոտ, ապա դա շատ նման է դիվերսիայի: NEWS.am-ի հետ զրույցում հուլիսի 22-ին վաղ առավոտյան Արցածի Քաշաթաղի շրջանում տեղի ունեցած ականի պայթյունի մասին նման կարծիք հայտնեց Ազգային անվտանգության ծառայության պետի նախկին տեղակալ, ՀԱԿ նախկին անդամ Գուրգեն Եղիազարյանը:
«Եթե ականը պայթել է այն տարածքում, որտեղով մարդիկ ամեն օր անցել են, ապա սա շատ նման է դիվերսիայի, շատ նման է: Պետք է Քարվաճառի դեպքերից հետո դեռ ուսումնասիրվեր ամբողջ տարածքը, զգույշ լինեին: Ըստ երեւույթին, սրանք ադրբեջանցիների կողմից հարձակումներ են, որոնց մենք լուրջ չենք վերաբերվում, սակայն պետք է ուշադրություն դարձնենք»,- ասաց նա:
Գուրգեն Եղիազարյանի համոզմամբ՝ Ազգային անվտանգության ծառայությունն ու պաշտպանության նախարարությունը պետք է ոչ մի դեպքում չթուլանան. «Ազգային անվտանգության ծառայությունը ոչ թե ընդդիմադիրներին գաղտնալսելու համար, այլ մեր անվտանգության զբաղվելու: Մենք պատերազմի մեջ ենք, իսկ միջգյուղային ճանապարհով մարդիկ օրը ցերեկով ականի վրա պայթում են: Սա խայտառակություն է բառիս բուն եւ լայն իմաստով, իսկ մեր համապատասխան կառույցները պարապության են մատնված: Երբ Սերժ Սարգսյանը ասաց «ապահով Հայաստան», սկսեցինք պայթել, զոհվել, միգուցե խնդրենք՝ էլ չասի»:
Նշենք, որ Քաշաթաղի վարչակազմի աշխատակազմի ղեկավարը NEWS.am-ի հետ զրույցում հայտնել էր, որ դեպքը տեղի է ունեցել այնտեղ, որտեղով իրենք ամեն օր անցնում են:
Հիշեցնենք, որ դեպքը ըստ Արտակարգ իրավիճակների նախարարության տեղի է ունեցել հուլիսի 22-ին առավոտյան ժամը 06.30-ին սահմաններում ԼՂՀ-ի Քաշաթաղի շրջանի Վաղազին գյուղում. «Տոյոտա պրադո» մակնիշի 71OM100 պետհամարանիշի ավտոմեքենան պայթել է ականապատ տարածքում, ինչից վարորդը տեղում զոհվել է, իսկ ուղևորներ Ռուբեն Խլղաթյանը, Գառնիկ Ավետիսյանը եւ Արթուր Բաղդասարյանը հոսպիտալացվել են բժշկական կենտրոն, այնուհետեւ ուղղաթիռով տեղափոխվել Երևանի «Էրեբունի» բժշկական կենտրոն:
