Ազգային անվտանգության ծառայության պետի նախկին տեղակալ, ՀԱԿ նախկին անդամ Գուրգեն Եղիազարյանը համոզված է, որ հուլիսի սկզբին ազատագրված Քարվաճառի տարածք ներթափանցած ադրբեջանցիները դիվերսանտներ չեն, այլ սովորական թմրամոլներ:
«Ո՞վ է ասում, որ բռնվածները դիվերսանտներ են: Ինձ կներեք, բայց դիվերսանտը չի գալիս ուրիշի տարածք, կով գողանում, հետո խաշլամա, խորոված անում: Դիվերսանտները որոշակի մարզված վիճակում են լինում, նրանք իմ կարծիքով թմրանյութ օգտագործող սրիկաների խումբ են եղել, որը իմանալով մեր սահմանների մասին՝ էդ թմրամոլները եկել էին, որ հետո էլ պատմեին, թե եկել են, քեֆ արել Ղարաբաղում: Խորոված անող ու ոըտող դիվերսա՞նտ է լինում»,- NEWS.am-ի հետ զրույցում ասաց Գուրգեն Եղիազարյանը:
Նրա խոսքով՝ վատն այն է, որ ադրբեջանցիները գիտեն, որ հեշտությամբ կարող են մտնել մեր տարածք, իսկ հայկական կողմն էլ պետք է հետեւություններ աներ, մեղավորներին հեռացներ աշխատանքից. «Այս իրավիճակի համար չի կարելի ասել, որ միայն պաշտպանության նախարարն է մեղավոր: Պարտադիր պետք է որոշ մարդկանց ուղղակի պատասխանատվության ենթարկել, այսինքն բոլոր նրանց, ովքեր պատասխանատու են մեր երկրի անվտանգության համար: Սա առաջին հերթին ուժայինների թերացումն է»:
Ավելի վաղ NEWS.am-ը հայտնել էր, որ ԼՂՀ եւ ՀՀ պետական սահմանահատվածում (Քարվաճառի ուղղություն) հակառակորդը հուլիսի 11-ին ձեռնարկել էր հերթական հետախուզադիվերսիոն ներթափանցման փորձը, որը չեզոքացնելիս հայ զինծառայողները ոչնչացրել են մեկ դիվերսանտի, երկուսին ձերբակալել: Փոխհրաձգության ժամանակ զոհվել է հայ սպա`1972 թվականին ծնված մայոր Սարգիս Աբրահամյանը, վիրավորվել է 1977 թվականին ծնված Կարինե Դավթյանը: Դիվերսանտները նաեւ սպանել են Քարվաճառի 17-ամյա բնակիչ Սմբատ Ցականյանին: Կատարվածի առնչությամբ ԼՂՀ գլխավոր դատախազությունում քրեական գործ է հարուցվել: