Թուրքիայի նախագահի թեկնածուներից Սելահաթին Դեմիրթաշը թուրքական NTV հեռուստաընկերության եթերում խոսել է Թուրքիայի խնդրիներից՝ շեշտելով տարիներով ժխտվող Հայոց ցեղասպանության հարցը։
Թուրքիայում «Ժողովուրդների դեմոկրատական» կուսակցության (HDP) կողմից Թուրքիայի նախագահի թեկնածու առաջադրված Սելահաթին Դեմիրթաշը NTV-ի եթերում հայտնել է, թե ընտրվելու դեպքում ձեռնամուխ է լինելու նոր Սահմանադրության ստեղծման գործին։
Դեմիրթաշը քննադատել է թուրքական իշխանությունների խտրական վերաբերմունքը Թուրքիայի ոչ թուրք բնակչության հանդեպ՝ հիշեցնելով մի շարք խնդիրներ։ «Թուրքիայում կա Հայոց ցեղասպանության հարցը, որը դեռեւս ժխտվում է, կա Դերսիմի, Մարաշի, Սիվասի եւ Գեզիի կոտորածների հարցը, կա քուրդ ժողովրդի դեմ իրականացվող գործողություններ»,-ասել է Դեմիրթաշը։
Նշենք, որ Սելահաթին Դեմիրթաշը բազմիցս դատապարտել է Օսմանյան Թուրքիայում իրականացված Հայոց ցեղասպանությունը եւ պնդել, որ Թուրքիան պետք է ճանաչի Ցեղասպանությունը։