Ադրբեջանի նախագահ Իլհամ Ալիեւը ընդունել է Հարավային Կովկասում Եվրամիության հատուկ ներկայացուցիչ Հերբերթ Սալբերին:
Ինչպես հաղորդում է ԱՊԱ գործակալությունը, շնորհավորելով Հ. Սալբերին նշանակման կապակցությամբ, Իլհամ Ալիեւը վստահություն է հայտնել, որ սա լավ հնարավորություն է տարածաշրջանում իրավիճակին ծանոթանալու համար: Ալիեւը հավաստիացրել է, որ Ադրբեջանը ղարաբաղյան հակամարտության խաղաղ կարգավորման կողմնակից է՝ Հայաստանին մեղադրելով «ոչ կառուցողական լինելու» եւ «միջազգային իրավունքի դրույթներն արհամարհելու մեջ»:
Ավելին Իլհամ Ալիեւը նշել է, որ եթե «ղարաբաղյան խնդիրը արդարացիորեն չլուծվի, միջազգային իրավունքի շրջանակներում, իրավիճակը տարածաշրջանում կարող է ավելի խորանալ»:
Ի պատասխան Հ.Սալբերն ընդգծել է, որ տարբեր ժամանակներում այցելել է տարածաշրջան եւ ծանոթ է իրավիճակին: Նա ասել է, որ իր կողմից ներկայացվող կառույցը մտադիր է իր ավանդն ունենալ գոյություն ունեցող հակամարտության կարգավորմանը:
