Արցախի Քաշաթաղի շրջանում հուլիսի 22-ին վաղ առավոտյան պայթած ավտոմեքենան պատկանել է տուժած Գառնիկ Ավետիսյանին:

Ինչպես տեղեկանում ենք ԼՂՀ ոստիկանության լրատվական ծառայությունից, «հուլիսի 22-ին, ժամը 06:20-ին, անհայտ քաղաքացուց ոստիկանության Քաշաթաղի շրջբաժնի հերթապահ մաս ահազանգ է ստացվել այն մասին, որ Քաշաթաղի շրջանի Վաղազին գյուղի տարածքում ավտոմեքենա է պայթել: Մեկնած օպերատիվ խումբը պարզել է, որ նույն օրը, ժամը 06:00-ի սահմաններում, ոմն Արմենը (տվյալները պարզվում են), նշված գյուղից մոտ 10 կիլոմետր հեռավորության վրա գտնվող «Ոսկեսար» տեղանքում, վարելով ՀՀ Երևան քաղաքի Բուռնազյան փողոցի N տան բնակիչ, 1971թ. ծնված Գառնիկ Ավետիսյանին պատկանող «Toyota Land Cruiser» մակնիշի ավտոմեքենան, պայթել է չպարզված պայթուցիկ սարքի վրա:

Վթարի հետևանքով ուղևորներ` Գառնիկ Ավետիսյանը, ՀՀ Արմավիր քաղաքի Երևանյան փողոցի 1-ին նրբանցքի N տան բնակիչ, 1961թ. ծնված Ռուբեն Խլղաթյանն ու Ստեփանակերտ քաղաքի Վ. Սարգսյան փողոցի թիվ 5 շենքի N բնակարանի բնակիչ, 1961թ. ծնված Արթուր Բաղդասարյանը ստացել են մարմնական վնասվածքներ, իսկ ՀՀ Արմավիր քաղաքի Կոմիտասի փողոցի 88 տան բնակիչ, 1967թ. ծնված Արամ Գարուշի Խլղաթյանը մահացել է»:

Հիշեցնենք, որ դեպքը տեղի է ունեցել հուլիսի 22-ին առավոտյան ժամը 06.30-ի սահմաններում ԼՂՀ-ի Քաշաթաղի շրջանի Վաղազին գյուղում. «Տոյոտա պրադո» մակնիշի 71OM100 պետհամարանիշի ավտոմեքենան պայթել է ականապատ տարածքում: Սկզբնապես հաղորդվում էր, թե վարորդը տեղում զոհվել է, իսկ այնուհետ հաղորդվեց, որ վարորդն այլ մարդ է եղել, ում որոնում են: Մեքենայի ուղևորներ Ռուբեն Խլղաթյանը, Գառնիկ Ավետիսյանը եւ Արթուր Բաղդասարյանը հոսպիտալացվել են բժշկական կենտրոն, այնուհետեւ ուղղաթիռով տեղափոխվել Երևանի «Էրեբունի» բժշկական կենտրոն:  

Նախնական տվյալներով՝ Արմավիրի քաղաքապետն ընկերների հետ որսի էր գնացել այդ տարածք: