ԵԱՀԿ Մինսկի խմբի համանախագահներն այսօր հանդես են եկել հայտարարությամբ՝ խորը մտահոգություն հայտնելով շփման գծում եւ հայ-ադրբեջանական սահմանին լարվածության եւ բռնությունների աճի, այդ թվում՝ քաղաքացիական անձանց նպատակաուղղված սպանությունների կապակցությամբ: Այդ մասին հայտնում է «Ազատություն» ռադիոկայանը:
«Համանախագահները կողմերին կոչ են արել կատարել մարդկային զոհերից խուսափելու՝ իրենց պարտավորվածությունները, եւ անընդունելի են որակել գյուղերի եւ քաղաքացիական անձանց՝ նպատակաուղղված թիրախավորումը: Նրանք կոչ են արել արտգործնախարարներին մեղմացնել լարվածությունը եւ հավատարիմ մնալ հրադադարի պայմաններին», - ասված է հաղորդագրությունում:
ԵԱՀԿ Մինսկի խմբի համանախագահները՝ (դեսպաններ Իգոր Պոպովը (Ռուսաստան), Ջեյմս Ուորլիքը (ԱՄՆ) եւ Պիեռ Անդրիոյը (Ֆրանսիա) հուլիսի 22-ին Բրյուսելում առանձին առանձին հանդիպումներ են ունեցել Հայաստանի արտգործնախարար Էդվարդ Նալբանդյանի եւ Ադրբեջանի արտգործնախարար Էլմար Մամեդյարովի հետ:
ԵԱՀԿ գործող նախագահի անձնական ներկայացուցիչ Անջեյ Կասպրչիկը նույնպես մասնակցել է հանդիպումներին:
Այսօր տարածած ամփոփիչ հայտարարության մեջ ասվում է, որ հանդիպումների ընթացքում համանախագահները եւ արտգործնախարարները քննարկել են նախագահների մակարդակով հանդիպման հնարավոր օրակարգը՝ ընդգծելով Հայաստանի եւ Ադրբեջանի նախագահների միջեւ հանդիպումների կարեւորությունը խաղաղ բանակցություններում առաջընթաց արձանագրելու համար: Նրանք նաեւ քննարկել են Նյու Յորքում՝ ՄԱԿ-ի Գլխավոր ասամբլեայի շրջանակներում հանդիպումների հնարավորությունները:
«Համանախագահները շարունակում են կողմերի հետ դիտարկել անվտանգության նկատմամբ վստահության ամրապնդման միջոցները եւ հասարակ քաղաքացիների միջեւ հանդիպումների ծրագրերը: Նրանք կարծում են, որ նման ծրագրերը ամրապնդում են տեւական խաղաղության հաստատման համար անհրաժեշտ վստահությունն ու հավատը», - նաեւ ասված է համանախագահների հայտարարությունում: