«Նուբարաշեն» քրեակատարողական հիմնարկի դատապարտյալ, 13 տարվա ազատազրկման դատապարտված 21-ամյա Թովմաս Վարդանյանը հացադուլ է հայտարարել: Այս մասին NEWS.am-ի հետ զրույցում ասաց դատապարտյալը մայրը՝ Կիմա Վարդանյանը:
«Հուլիսի 22-ին գնացել էիր որդուս տեսակցության, պարզվեց, որ հացադուլ է սկսել: Սկզբում չէին թողնում՝ մտնեի մոտը, մի կերպ համոզել եմ, մտել, որ տղայիս համոզեի հետ կանգնել այս քայլից: Բայց անօգուտ է. տղաս ասում է, որ միայն այս կերպ նրանց ուշադրությունն իր վրա կհրավիրի»,- ասաց նա:
Կիմա Վարդանյանի խոսքով՝ որդին հոգեկան խնդիրներ ունի, նա ամեն օր պետք է հոգեմետ դեղեր ընդունի, սակայն այժմ դրանից էլ հրաժարվել:
Նշենք, որ ըստ մեղադրական եզրակացության՝ օդանավակայանի սրճարաններից մեկի խոհարար օգնական Թովմաս Վարդանյանը դաժան ծեծի է ենթարկել իրենց մոտ սպասք լվացող Հայկանուշին, քանի որ չի ցանկացել վերադարձնել 500 ԱՄՆ դոլար եւ 100 հազար դրամ պարտքը: Առաջին ատյանի դատարանը մեղավոր է ճանաչել Թովմասին Քրեական օրենսգրքի 34-104-րդ հոդվածի 2-րդ մասի 8-րդ կետով եւ դատապարտել 13 տարվա ազատազրկման: Վերաքննիչ քրեական դատարանն անփոփոխ է թողել առաջին ատյանի դատարանի որոշումը:
