Հանրապետական սենատոր Ջոն Մաքքեյնը Ռուսաստանի դեմ ԵՄ-ի պատժամիջոցները The Telegraph-ի հետ հարցազրույցում կատակ է անվանել:
«Դա կատակ է, ԵՄ-ն ոչինչ չի ձեռնարկի այնքան ժամանակ, քանի դեռ կախում ունի ռուսական էներգետիկայից: Մինչ այդ միայն կխոսեն», - հայտարարել է սենատորը:
Նա նաեւ նշել է, որ ԵՄ-ի անգործության պայմաններում Մեծ Բրիտանիան կարող էր միակողմանի գործել եւ բանկային սահմանափակումներ կիրառել: Սակայն բրիտանական կառավարությունը հազիվ թե դա անի, քանի որ «ցանկանում են այդ փողերը Լոնդոնում պահել»:
ԵՄ-ի դեսպանների խորհուրդը հուլիսի 24-ին կքննարկի Ռուսաստանի դեմ նոր պատժամիջոցների հարցը:
Նախօրեին ԵՄ էներգետիկայի հարցերով հանձնակատար Գյունտեր Էթինգերը հայտարարել էր, որ ռուսական գազի եւ նավթի մատակարարումները չպետք է պատժամիջոցների օբյեկտ հանդիսանան:
