Բրիտանական Լանքաշիր կոմսության 29-ամյա բնակիչ Լուիս Դենիերը պնդում է, որ կարող է ընդհանուր լեզու գտնել ցանկացած կատվի հետ, քանի որ մեծացել է կենդանիների շրջապատում եւ ուշադիր ուսումնասիրել նրանց վարքը: Երիտասարդի խոսքով, կատուների հետ ինքը խոսում է թարթելու եւ մարմնի լեզվի օգնությամբ: Իրեն «Քեթմեն» կոչող բրիտանացին կենդանիների հետ սկսում է «զրուցել»՝ նրանց աչքով անելով:
«Ես ցուցադրում եմ իմ խոցելիությունը՝ դանդաղորեն բացելով ու փակելով աչքերս: 10-ից 9 դեպքերում նրանք ի պատասխան թարթում են: Այսինքն՝ կարծես ասում են, որ պատրաստ են վստահել ինձ»,- բրիտանացի երիտասարդի խոսքերն է մեջբերում MailOnline-ը:
Լուիսն այնքան վստահ է իր անհավանական ունակությունների հարցում, որ իրեն կատուների թարգմանիչ եւ հոգեբան է հռչակել, այնուհետեւ սկսել է իր ծառայություններն առաջարկել կատուների տերերին: Երիտասարդը կարծում է, որ իր ունակությունները կարող են օգնել խնդրահարույց կենդանիների տերերին:
Բրիտանացու վերջնական նպատակը սեփական շոուն ստեղծելն է, որը մարդկանց օգնելու է ավելի լավ հասկանալ իրենց սիրելի կենդանիներին:
