ՀՀ Վերաքննիչ քրեական դատարանը, «Վերնիսաժի» կրակոցների գործով կալանավորված Վալերի Հովհաննիսյանի խափանման միջոց կալանքը երկու ամսով երկարացնելու առաջին ատյանի դատարանի որոշումը թողեց անփոփոխ, նա կմնա կալանք տակ: Այս մասին այսօր՝ հուլիսի 24-ին լրագրողների հետ զրույցում ասաց Վալերի Հովհաննիսյանի փաստաբան Լեւոն Բաղդասարյանը:

«Մենք բողոքարկել էինք այդ դատական ակտը, գործում առկա էր հատուկ մասնագետ-բժշկի տեղեկանքը, ըստ որի,  նպատակահարմար չէր քննչական գործողություններ կատարել, բայց 4 ժամ քննություն կատարելուց հետ կայացրեցին դատական ակտ եւ կալանավորեցին: Դատարանն այսօր գործը քննեց նրա բացակայությամբ, որոշեցին, որ գործը կարող է քննվել նրա բացակայությամբ: Բայց Վալերին եղել է անգիտակից, կիսագիտակից վիճակում առաջին ատյանի դատարանում եւ չի հասկացել, թե իրեն ինչում են մեղադրում»,- տեղեկացրեց փաստաբանը:

Լեւոն Բաղդասարյանի խոսքով՝ Վալերի Հովհաննիսյանին այս կերպ «խոշտանգում են». «Սա անմարդկային վերաբերմունք է՝ խոշտանգում, որն օրենքով եւ կոնվենցիայով արգելված է: Այս որոշումը վիճարկելու եմ Վճռաբեկ դատարանում եւ դիմելու Մարդու իրավունքների եվրոպական դատարան: Ասեմ՝ նրա աղիքը կախված է եւ անհրաժեշտություն կա երկրորդ վիրահատություն անելու, բայց մինչեւ դա անհրաժեշտություն է, որ նա առողջանա: Ես բժիշկ չեմ, բայց իմ կարծիքով, նա պետք է կարողանա ստացիոնար բուժվել քաղաքացիական հիվանդանոցում, որպեսզի լիովին կազդուրվի»:

Փաստաբանը նշեց, որ իրենք հարցում են արել, որպեսզի պարզեն, թե արդյոք իրավաչափ է Վալերի Հովհաննիսյանին «Դատապարտյալների հիվանդանոց» քրեակատարողական հիմնարկում բուժելը:

«Հարցում ենք արել, որպեսզի տեսնենք՝ արդյոք այդ հիվանդանոցում համապատասխան մասնագետներ, գիտելիքներ, միջոցներ եւ տեխնիկա կա, որ կարողանա իմ պաշտպանյալը առողջությունը վերականգնել»,- ասաց Լեւոն Բաղդասարյանը։