Երիտասարդությունը չի ցանկանում պրակտիկա անցնել ջերմոցներում: Այս մասին NEWS.am-ի թղթակցի հետ զրույցում հայտարարեց Հայաստանի ջերմոցային տնտեսությունների ասոցիացիայի նախագահ Պողոս Գեւորգյանը: Ասում է՝ մի քանի անգամ դիմել է Հայաստանի Ագրարային համալսարանին՝ խնդրելով ուսանողներին պրակտիկայի ուղարկել: Ընդ որում, Ասոցիացիան առաջարկել է անվճար պրակտիկա անցկացնել, իսկ լավագույններին՝ աշխատանքի հրավիրել:
«Ցավոք, ոչ ոքի չուղարկեցին: Ափսոս, քանի որ այդ մասնագիտական բուհ է, որը պետք է մեզ համար կադրային հենարան լինի»,- հայտարարել է Գեւորգյանը:
Ասոցիացիայի ջերմոցներում պրակտիկայի են ուղարկում Ագրոբիզնեսի ուսումնասիրության կենտրոնի ուսանողներին, որը գործում է ԱՄՆ գյուղատնտեսության դեպարտամենտի աջակցությամբ:
«Նրանք գյուղատնտեսության ոլորտում մենեջմենթ են ուսանում, եւ մենք հաճույքով նրանց ամեն ինչ բացատրում ենք. ե՛ւ բույսերի խնամք, ե՛ւ մարքեթինգ, ե՛ւ շուկաներ: Բայց կցանկանայինք նաեւ գյուղատնտեսների տեսնել, քանի որ երիտասարդ մասնագետները չափազանց քիչ են»,- ամփոփեց Պողոս Գեւորգյանը: