Լեռնային Ղարաբաղի Քարվաճառի շրջանում վնասազերծված ադրբեջանցի դիվերսանտ Հասան Հասանովի եղբայր Նաիլ Հասանովը ճանաչել է նրան լուսանկարով:
ԱՊԱ գործակալության փոխանցմամբ, Ն. Հասանովը նշել է, որ եղբոր դիակի լուսանկարը իր ընտանիքի անդամներին Կարմիր խաչի միջազգային կոմիտեում են ցույց տվել. «Ես անմիջապես ճանաչեցի եղբորս լուսանկարից: Սակայն այնտեղ որոշ մութ պահեր կան, եւ դիակի փորձաքննությունը լույս կսփռի դրանց վրա»:
Հիշեցնենք, որ խոսքը Քարվաճառում վնասազերծված դիվերսիոն-հետախուզական խմբի անդամների մասին է: Անդամներից մեկը սպանված է, եւս երկուսը կալանավորված են: Ղարաբաղյան կողմը հայտարարել է, որ կալանավորվածներին մեղադրանքներ են առաջադրվել քրեական օրենսգրքի մի շարք հոդվածներով:
Ադրբեջանական կողմը ամեն կերպ փորձում է համոզել համաշխարհային հանրությանը, որ խմբի կալանավորված անդամները ընդամենը «պիկնիկի» էին մեկնել եւ չար դիտավորություն չեն ունեցել:
Այս համատեքստում հիշեցնենք, որ Ադրբեջանում գերի ընկած հայերին ադրբեջանցիները անմիջապես «դիվերսանտ» են որակում: Այս ճակատագրին է արժանացել մեծահասակ Մամիկոն Խոջոյանը: Հոգեկան հիվանդ ու ծեր մարդը ներկայացվել էր որպես «դիվերսանտ»: Այդ միտքը նույնիսկ ադրբեջանական լրատվամիջոցների եւ սոցկայքերի կողմից էր ծաղրի ենթարկվել: Գերությունից ազատվելուց հետո, տարեց մարդը ինքնասպան է եղել:
Նման ճակատագրի է արժանացել նաեւ հայ պատանի Մանվել Սարիբեկյանը: Պատանին որպես «դիվերսանտ» էր ներկայացվել: 2010թ. հոկտեմբերի 5-ին Ադրբեջանի պաշտպանության նախարարությունը եւ ռազմական դատախազությունը համատեղ հայտարարություն էին տարածել, որ գերեվարված Սարիբեկյանը ինքնասպանություն է գործել: Մահացածի դին հայկական կողմին մեկ ամիս անց էր հանձնվել: