Արսենի Յացենյուկը հրաժարական է տվել Ուկրաինայի վարչապետի պաշտոնից, «կապված կոալիցիայի փլուզման եւ կառավարության նախաձեռնությունները արգելափակելու հետ», հաղորդում է ՈՒՆԻԱՆ-ը:
Հանդես գալով Ուկրաինայի Գերագույն Ռադայի ամբիոնից, Յացենյուկը հայտարարել է, որ ոչ մի դեպքում չի համաձայնի կոալիցիա կազմել Ռեգիոնների կուսակցության եւ կոմկուսի հետ, իսկ քանի որ գործող կոալիցիան ցրվել է, ապա ինքը որոշել է հրաժարական տալ:
«Կառավարությունն ի՞նչ տարբերակներ ունի: Քանի որ մեզ մոտ նախագահա-խորհրդարանական հանրապետություն է, ապա առաջին տարբերակով կոալիցիայի ցրվելուց հետո վարչապետը սկսում է նոր կոալիցիա ձեւավորել: Ի՞նչ է դա նշանակում. Դա նշանակում է, որ վարչապետը պետք է կոալիցիայում ընդգրկի կոմունիստներին եւ «ռեգիոնականներին»: Ես դա ոչ մի դեպքում չեմ անի»,-ընդգծել է Յացենյուկը:
Նրա խոսքով՝ «կա երկրորդ տարբերակը, որի դեպքում կառավարությունն ու վարչապետը պետք է հրաժարական տան: «Ես հայտարարում եմ իմ հրաժարականի մասին»,-ասել է նա:
