Ամերիկյան Ֆլորիդա նահանգի հիվանդանոցի բժիշկները ստիպված են եղել բառացիորեն մաս-մաս հավաքել մի պատանու աջ ձեռքը, որը հոր հետ կիրակնօրյա ձկնորսության ժամանակ բզկտել է տղայի վրա հարձակված բարակուդան:
13-ամյա Փարքեր Քինգը մահից է փրկվել: Ափից 32 կմ հեռավորությամբ տեղի ունեցած հարձակումից հետո նա մեծ քանակությամբ արյուն է կորցրել:
Ըստ Mail Online-ի, ողբերգությունը սկսվել է, երբ հայր ու որդի մեծ բարակուդա են տեսել եւ որոշել են որսալ այդ հայտնի թռչող ձուկը: Դրանք ագրեսիվ ձկներ են, որոնց երկարությունը կարող է հասնել մինչեւ երկու մետրի, իսկ ատամներն ածելիի նման սուր են:
Տղայի հոր՝ Իրվինի խոսքով, հաշված վայրկյանների ընթացքում ձուկը մոտեցել է նավակին եւ թռչելով՝ հարվածել Փարքերի կրծքի վերին հատվածին: Տղայի վերքերը մեծ են եղել, եւ նա սկսել է արագորեն արյունաքամ լինել: FedPost.ru-ի փոխանցմամբ, մեծ խնդիր է եղել նաեւ այն, որ ձկնորսական նավակն ափից բավական մեծ հեռավորությամբ է եղել:
Փարքերի կյանքը մազից կախված է եղել, սակայն, բարեբախտաբար, հայրը կարողացել է ժամանակին նրան հիվանդանոց հասցնել: Բժիշկների տեղեկացմամբ, տղայի կյանքին հիմա վտանգ չի սպառնում: