Լեւոն տեր-Պետրոսյանն ամեն ինչ անում է, որ մենք մոռանանք, որ ինքը եղել է նախագահ։ ՀԱԿ առաջնորդի վերջին հարցազրույցին այսօր՝ հուլիսի 24-ին, ՀՀԿ ԳՄ նիստից հետո լրագրողների հետ զրույցում այսպես արձագանքեց ՀՀԿ մամուլի խոսնակ, ԱԺ փոխնախագահ Էդուարդ Շարմազանովը։
«Առաջին նախագահն ամեն ինչ անում է, որ մենք մոռանանք, որ ինքը եղել է նախագահ։ Ափսոսում եմ, որ հալած յուղի տեղ եք ընդունում իր ասածները։ Միգուցե ճնշումներ եղել են, բայց դա իր ժամանակին է եղել, ոչ թե այսօր։ Ձեր նշած անձնավորության հարցազրույցին ես անդրադարձել եմ, եւ կարծում եմ, որ ինքն ու իր ղեկավարած քաղաքական ուժը նույնիսկ դաշնակիցների մոտ ազդեցիկ չի կարող համարվել։ Նա նման է այլ քաղաքական ուժերի վերջին վագոնի»,- ասաց նա։
Անդրադառնալով Սերժ Սարգսյանի այսօր արված հայտարարությանը, թե քննարկվում է սահմանամերձ գյուղերի բնակիչներին զինելու հարցը, Էդուարդ Շարմազանովը նշեց, որ մշուշոտ է պատերազմի վտանգը, սակայն եթե խաղաղություն ես ուզում, ապա պետք է պատրաստ լինես պատերազմի։
Լրագրողների հարցին, թե ԳՄ նիստի ժամանակ քննարկվել է Հովիկ Աբրահամյանի հարյուր-օրյա աշխատանքը, ՀՀԿ մամուլի խոսնակը պատասխանեց. «Գործադիր մարմնի նիստի ժամանակ նման քննարկում չի եղել։ Հարյուր օրը քիչ է, որ մենք գնահատական հնչեցնենք, իսկ ընդհանուր առմամբ՝ Հովիկ Աբրահամյանն աչալուրջ է բոլոր խնդիրներին»։
