Հայ փորձագետները մտահոգված են համացանցի մուտքի անվտանգության խնդիրներով:
Մասնավորապես, ինչպես ընդգծում է տեղեկատվական անվտանգության հարցերով մասնագետ Սամվել Մարտիրոսյանը, «ամեն դեպքում», Հայաստանը համացանցի մուտքի այլընտրանք չունի:
«Մենք շատ խոցելի ենք այդ հարցում: Փաստացի ինտերնետ-կապն ապահովում են 4 ընկերություններ՝ «Ռոստելեկոմը», «Ucom»-ը, «Beeline»-ը եւ «ADC»-ն: Դրանք բոլորն անցնում են Վրաստանի տարածքով»,- պարզաբանել է փորձագետը:
Ընդ որում Մարստիրոսյանը որպես այլընտրանք անվանել է 2 լար, որոնք պատկանում են «GNC Ալֆա» եւ «Beeline» ընկերություններին, որոնք կապում են Իրանի հետ: Սակայն փորձագետը նշել է, որ դրանք չեն շահագործվում:
Մարտիրոսյանը ենթադրում է, որ պատճառը հետեւյալն է՝ պրովայդերների համար ավելի էժան է աշխատել Վրաստանի, քանի թե Իրանի միջոցով:
Նման կարծիք ունի նաեւ «Ինտերնետ հասարակություն» ընկերության փոխնախագահ Գրիգորի Սահինյանը, ով պնդում է, թե խնդիրը հնարավոր է նաեւ այլ կերպ լուծել:
«Մենք կարող ենք Վրաստանի հետ համատեղ ընկերություն հիմնել, որտեղ մենք գերակշիռ դեր կունենանք»,- նշել է նա:
Այն հարցին, թե ով պետք է զբաղվի դրանով եւ ինչ դեր են գրավում հայկական իշխանությունները, Սահինյանը նշել է, որ տվյալ հարցի լուծումը պետական կարեւորության խնդիր է, սակայն մինչ այդ պահը խնդրին արժանի ուշադրություն չի հատկացվել:
«Չկա գերատեսչություն, որն իր վրա կվերցնի որեւէ պատասխանատվություն: Կապի եւ տրանսպորտի նախարարությունը պատասխանատվություն է կրում միայն նրա համար, թե ինչ է կատարվում երկրի ներսում»,- եզրափակել է նա:
Ինչպես նախկինում հայտնում էր NEWS.am-ը, վկայակոչելով «Ucom» ընկերության մամուլի ծառայությանը, Վրաստանում հուլիսի 23-ին ժամը 20:20-ի սահմաններում վնասվել է կենտրոնական լարը, որը Եվրոպան միացնում է Հայաստանի հետ, ինչի հետեւանքով խափանվել է ինտերնետ կապը, որը վերականգնվել է հուլիսի 24-ին: