Հայաստանի տասնյակ փոքր ջերմոցներ չեն կարողանում վճարել գազի համար կուտակված պարտքերը: Այս մասին NEWS.am-ի թղթակցի հետ զրույցում հայտարարեց Հայաստանի ջերմոցային տնտեսությունների ասոցիացիայի նախագահ Պողոս Գեւորգյանը:
2013 թվականի հուլիսին 18%-ով գազի սակագնի բարձրացումը ջերմոցատերերի վրա անդրադարձավ 2013-14թ.թ. ձմռանը: Գազի համար նրանց հաշիվները մեծացան, իսկ բանջարեղենի գները համապատասխանաբար ավելացնել չհաջողվեց. թուրքական լոլիկի եւ վարունգի մրցակցությունը խանգարեց: Արդյունքում գարնանային բերքի վաճառքից ստացված գումարն արդեն չբավականացրեց գազի պարտքերը վճարելու համար: Դրա համար վարկեր են վերցնում, քանի որ «Գազպրոմ Հայաստան»-ը գազ մատակարարում է միայն կանխավճարի դեպքում, իսկ սեզոնի սկզբին, բերքը ստանալուց շատ առաջ, ֆերմերները չեն կարողանում վճարել եւ ստիպված են լինում վարկ վերցնել, որը վերադարձնում են գարնանը:
Գազի թանկացումից հետո շատ ջերմոցներում այն գրեթե կիսով չափ են միացրել, ինչի հետեւանքով բերքն էլ այն չէր: «Մեր միության անդամներից մեկը, օրինակ, անցյալ տարվա համեմատ 40%-ով ավելի քիչ բերք է ստացել: Եվ վարկը փակելու համար գումար չունի»,- նշեց Գեւորգյանը:
Եղել են նաեւ դեպքեր, երբ ձմռան կեսին գազի համար չվճարած ջերմոցներում երկնագույն վառելիքն անջատել են: Մարտին ստիպված են եղել նորից տնկել, բայց ամռանն արդեն ստացված բերքն ավելի էժան են վաճառել, իսկ պարտքերը մարել չի հաջողվել:
