Արցախի Քաշաթաղի շրջանում հուլիսի 22-ի վաղ առավոտյան ականի պայթյունից վիրավորված Ստեփանակերտի բնակիչ Արթուր Բաղդասարյանի ու Երեւանի բնակիչ Գառնիկ Ավետիսյանի վիճակը ծանր է, սակայն բավականին կայունացել է: Այս մասին NEWS.am-ի հետ զրույցում ասաց «Էրեբունի» բժշկական կենտրոնի վերակենդանացման բաժնի վարիչ Արմեն Մուրադյանը:
«Երկուսի վիճակն էլ ծանր է, սակայն ահագին կայունացել է: Գառնիկ Ավետիսյանին արդեն հաջորդ շաբաթ կվիրահատենք ողնաշարը, սպասում ենք, որ վիճակը կայունանա: Հաշմանդամության մասին խոսելն էլ դեռ վաղ է, պետք է սպասել վիրահատությանը»,- ասաց նա:
Ականի պայթյունից վիրավորված Արմավիրի քաղաքապետն էլ արդեն տեղափոխվել է հիվանդասենյակ, նրա վիճակը լավ է:
Հիշեցնենք, որ Գառնիկ Ավետիսյանին պատկանող «Տոյոտա պրադո» մակնիշի 71OM100 պետհամարանիշի ավտոմեքենան պայթել է ԼՂՀ Քաշաթաղի շրջանի Վաղազին գյուղում՝ճանապարհահատվածին, որտեղով սովորաբար վաղազինցիներն անցնում են: Պայթյունի հետեւանքով Արմավիրի քաղաքապետ Ռուբեն Խլղաթյանը, ԼՂՀ բնակիչ Արթուր Բաղդասարյանը եւ մեքենայի սեփականատեր Գառնիկ Ավետիսյանը տեղափոխվել են Երեւանի «Էրեբունի» բժշկական կենտրոն: