Ազգային ժողովի ՀՀԿ խմբակցության պտտգամավոր Աշոտ Աղաբաբյանի համար զարմանալի է Գյումրիի պետական Մանկավարժական ինստիտուտի ռեկտոր Վարդեւան Գրիգորյանի եղբոր՝ Հարություն Գրիգորյանի սպանությունը: NEWS.am-ի հետ զրույցում ռեկտորի 15 տարվա ընկերը նշեց, որ կատարվածի մասին դեռ չի խոսել Վարդեւան Գրիգորյանի հետ:
«Իրականում տեղյակ չեմ, թե ինչու է նման բան տեղի ունեցել: Հարություն Գրիգորյանին միայն ընտրությունների ժամանակ եմ տեսել, մոտ չեմ եղել իր հատ, բայց Վարդեւանը իմ 10-15 տարվա ընկերն է»,- ասաց նա:
Հարցին՝ հնարավոր է Հարություն Գրիգորյանի սպանությունը կապված լինի հենց ռեկտորի հետ՝ Աշոտ Աղաբաբյանը պատասխանեց. «Վարդեւան Գրիգորյանի պես հանգիստ, վերաբերմունքով, փոխհարաբերությունները ճիշտ պահող մարդ է ինքը: Չեմ կարծում, որ իր պատճառով կամ մեղքով կարող է լինել այդ սպանությունը»:
Ավելի վաղ NEWS.am-ը հայտնել էր, որ հուլիսի 24-ին, ժամը 16:00-ի սահմանում, Շիրակի մարզի Գետք համայնքի չօգտագործվող ֆերմաներից մեկի տարածքում գտել են Գյումրիի պետական Մանկավարժական ինստիտուտի ռեկտոր Վարդեւան Գրիգորյանի եղբոր՝ Հարություն Գրիգորյանի դին՝ հրազենային վնասվածքով։