Նոր մանրամասներ են հայտնի դարձել հուլիսի 24-ի գիշերը Գյումրիում 36-ամյա Էդգար Անտիկյանի սպանության մասին։
Գյումրիում NEWS.am-ի թղթակիցը հաղորդում է, որ Էդգարին, նախնական տեղեկությամբ, դանակահարել է հորաքրոջ տղան, որին այս պահին ոստիկանութունը որոնում է։
Մեր տեղեկություններով՝ աշխատանքից հետո Էդգարը, որը շուկայում մսավաճառ էր, հորաքրոջ որդու եւ եւս երկու երիտասարդի հետ գնացել են իրենց տուն, խմել են, որից հետո վիճաբանություն է սկսվել, 3 երիտասարդները ծեծի են ենթարկել Էդգարին, իսկ հորաքրոջ որդին դանակահարել է նրան։
Նշենք, որ Էդգար Անտիկյանն ամուսնացած էր, ուներ 2 երեխա, կինը 3-րդ երեխային էր սպասում։
Ըստ ոստիկանության հաղորդագրության՝ հարուցվել է քրեական գործ ՀՀ քրեական օրենսգրքի 104 հոդվածի 1-ին մասի հատկանիշներով:
Կատարվում է նախաքննություն: